Ижтимоий тармоқларда мактаб доскасини уриб синдирган ўқувчи видеоси кенг тарқалиб, қизғин муҳокамаларга сабаб бўлганди. Мактабгача ва мактаб таълими вазирлиги ахборот хизмати масуъли Лайло Рустамованинг маълум қилишича, ўша ўқувчи топилган. 

Аниқланишича, видеодаги ҳолат Самарқанд вилоятининг Пайариқ туманидаги 19-мактабнинг 11-синф ўқувчиси томонидан содир этилган.

Воқеа эски бўлиб, 2022 йил ўша ўқувчи 10-синфда таҳсил олган пайтда содир этилган. Видео TikTok га жорий йилнинг 23 сентябрь куни жойлаган.

Самарқанд вилояти Мактабгача ва мактаб таълими бошқармаси берган маълумотларга кўра, ҳолат ўрганилганда ўқувчи томонидан мактаб мулкига келтирилган зарар унинг ота-онаси томонидан қоплаб берилган. Пайариқ туман ИИБ томонидан ўқувчининг отасига нисбатан Маъмурий жавобгарлик тўғрисидаги кодекснинг 47-моддаси 1-қисмига асосан маъмурий жазо қўлланган.

Бу нарса ўқувчига таъсир қилмаган, таъсир қилган бўлганида эди, бир йил олдин қилган қилмишини кўз-кўз қилиб, бугун Тик-Токъга чиқармаган бўларди. Афсуски, айрим ўқувчиларнинг мана шундай хатти-ҳаракатлари барча ёшлар номига иснод келтиради. Болани “тарбиялаганлар” номига шу бир неча кун ичида миллионлаб лаънатлар ёғилди. Фарзанд тарбияси бебаҳо неъмат эканлигини унутмаслигимиз лозим. Ўзимиз тарбияни қўлга олмасак, уларни йўриғига соладиганлар жуда кўп, — дейди Лайло Рустамова.