Ханчжоу—2022. Академик эшкак эшиш бўйича мусобақаларда медаллар, стол теннисида омадсизлик. Ўзбекистон вакилларининг Осиё ўйинларидаги натижалари

Ханчжоу—2022 ХIX ёзги Осиё ўйинлари 24 сентябрь, якшанба куни давом эттирилмоқда. 

Унда Ўзбекистон вакиллари турли спорт ўйинларида иштирок этмоқда.

Ўзбекистон делегацияси учун илк медал академик эшкаш эшиш бўйича аёллар ўртасида енгил вазн тоифасидаги жуфтлик дастурида иштирок этган Луизахон Исломова ҳамда Малика Тагматова ҳисобига ёзилди. 

Спортчилар муросасиз кечган финал дастурида марра чизиғини иккинчи бўлиб кесиб ўтди ва кумуш медалини қўлга киритди. 

Академик эшкак эшиш бўйича эркаклар ўртасида енгил вазнли спортчилар баҳсида Шаҳзод Нурматов ҳамда Собиржон Сафаралиев бронза медалига сазовор бўлди. Олтин ва кумуш медаллари эса Хитой ҳамда Ҳиндистон жамоаларига насиб этди.

Учинчи медал академик эшкак эшишнинг М2х дастурида иштирок этган Шаҳбоз Холмирзаев ҳамда Меҳрожбек Маматқулов томонидан қўлга киритилди. Жуфтлиги кумуш медалга сазовор бўлди. Мазкур стартда олтин медал Хитой, бронза медали эса Индонезияга насиб этди.

Делегациянинг Осиё ўйинларидаги навбатдаги медали М2- дастурида қатнашган академик эшкак эшувчилар Шеҳроз Ҳакимов ҳамда Дилшоджон Худойбердиев қўлга киритди. Улар марра чизиғини иккинчи бўлиб кесиб ўтди. Ушбу дастурда олтин медал Гонконг, бронза медали Ҳиндистон жамоаларига насиб этди.

Ўзбекистонлик стол теннисчилари плей-офф босқичидаги юришини чорак финал остонасида тугатди. Вьетнамга қарши баҳс олиб борган Марҳабо Магдиева, Розалина Хаджаева ҳамда Асел Эркебаевадан иборат жамоамиз 0:3 ҳисобида мағлубиятга учради.

Замонавий бешкураш бўйича аёллар ўртасидаги яккалик баҳслари якунланди. Унда иштирок этган Токи—2020 Олимпиадаси қатнашчиси Алисе Фахрутдинова мусобақани 1327 очко билан 7-ўринда тугатди. Ушбу натижа Фахрутдиновага Париж-2024 Олимпиадаси йўлланмасини тақдим қилди.

Қиличбозлик беллашувларида медаллар учун курашувчи спортчилар номи маълум бўлмоқда. Эркаклар ўртасидаги рапира дастурида иштирок этаётган ўзбекистонлик спортчилар финал босқичига йўл ола билмади. Муҳаммад Юсуф Асранов 1/8 финалда, Дониёр Саъдуллаев эса гуруҳ босқичида иштирокини якунлади. 

Ҳалима Қурбонова дзюдо бўйича Ўзбекистон терма жамоаси аъзосининг илк медалига муаллифлик қилди. Ўзбекистонлик спортчи бронза медали учун баҳсда жанубий кореялик Хекеонг Лига қарши татамига чиқиши керак эди. Бироқ рақиб спортчи курашмагани учун Қурбонова тўғридан тўғри совриндорлар қаторидан жой олди.

24 сентябрь кунги баҳслар давом эттирилмоқда.