Украина Мудофаа вазирлигининг Бош разведка бошқармаси Курскда операция ўтказиб, иккита нишонга — шаҳар марказидаги Федерал хавфсизлик хизмати (ФХХ) қароргоҳига ва аэродром яқинидаги нефтни қайта ишлаш заводига ҳужум қилди. Бу ҳақда “Украинская правда” хабар берди.

Маълум қилинишича, биринчи ҳолатда дрон бинога тўғридан-тўғри зарба берган, иккинчисида эса ёнғин бошланган. Вайронагарчилик ва қурбонлар кўлами ҳақида ҳозирча аниқ маълумот йўқ.

• 24-сентябр куни Курск вилояти губернатори Роман Старовойт Курскнинг марказий туманида Украина учувчисиз самолёти маъмурий бинога ҳужум қилиб, унинг томини бир оз шикастлагани ҳақида хабар берганди.

• Амалдор гап қайси объект ҳақида кетаётганига аниқлик киритмаган, бироқ видеони таҳлил қилган журналистлар ҳужум ФХХ вилоят бошқармаси биносига бўлган деган хулосага келган.
• 24-сентябр куни Курск шаҳар кунини нишонлайди. Расмийлар Курскнинг 991 йиллиги шарафига ўтказиладиган байрамларни бекор қилмасликларини айтган.