Ўзбекистон президенти ёрдамчиси Саида Мирзиёева Наманган вилоятига шахсан давлат раҳбарининг топшириқлари билан етиб борди.
Саида Мирзиёеванинг маълум қилишича, болаларнинг кайфияти яхши, ҳаммаси аста-секин тузалмоқда. Уларнинг кўпчилиги соғайгани учун уйига — оиласи бағрига қайтарилган.
“Вазиятни кўзимиз билан кўриш учун шифохонага бордик, болажонлар ҳолидан хабар олдик. Уларнинг кайфияти яхши, ҳаммалари аста-секин тузалишмоқда, кўпчилиги соғайгани учун уйига - оиласи бағрига қайтарилган.
⠀
Биз болаларнинг ота-оналари билан ҳам суҳбатлашдик, уларнинг ташвишига шерик эканимизни билдирдик.
⠀
Шундан сўнг боғча тарбияланувчилари билан содир бўлган ҳолат юзасидан соғлиқни сақлаш, СЭС, таълим, прокуратура ва бошқа тегишли соҳа мутасаддилари билан йиғилиш ўтказиб, вазиятни ва текширувнинг боришини муҳокама қилдик.
⠀
Ҳозирда ўрганиш ишлари давом этмоқда, жараён назоратга олинган, натижаси ҳақида қўшимча равишда хабар қилинади.
⠀
Бугунги кунда мазкур ҳолат бўйича жиноят иши қўзғатилган бўлиб, иш Наманган вилоят прокуратурасидан Бош прокуратурага ўтказилди”, — дейди Саида Мирзиёева.
“Дарё”га тақдим этилган маълумотларга кўра, болаларнинг касалланиш ҳолатлари нафақат Чустда, балки вилоятнинг бошқа ҳудудларида ҳам аниқланмоқда. Жумладан, Поп туманида 118, Наманган шаҳри ва Наманган туманида 8 нафардан, Янгиқўрғон туманида 6, Янги Наманган туманида эса 4 нафар боланинг яқинлари шифокорларга мурожаат қилган.
Наманганда охирги икки кун мобайнида болаларнинг касалланиш ҳолати билан боғлиқ 450 та мурожаат келиб тушган. Уларнинг энг кўпи — 306 таси Чуст туманига тўғри келмоқда.
Изоҳ (0)