Ўзбекистон Миллий гвардияси қўмондони генерал майор Рустам Жўраев мамлакат аҳолисига мурожаат билан чиқди.
Мурожаатда қайд этилишича, бугунги кунда айрим бозорлар, истироҳат боғлари ва хиёбонлар техник ва хавфсизлик воситалари билан етарли даражада жиҳозланмагани ҳамда жамоат назорати масканлари мавжуд эмаслиги оқибатида жиноят ва ҳуқуқбузарликлар содир этилмоқда ҳамда фавқулодда ҳолатлар юзага келмоқда.
Бундай салбий ҳолатларнинг олдини олиш мақсадида, Ўзбекистон Жамоат хавфсизлиги университети томонидан илмий ёндашган ҳолда яратилган “Қўқон тажрибаси” барча ҳудудлардаги бозорларда жорий этилади.
“Вилоятлар марказларидаги йирик бозорлар, истироҳат боғлари ва хиёбонларнинг маъмурияти билан биргаликда обектларнинг асосий кириш жойларига шахсни юзидан таниб оладиган видеокамераларни ўрнатиш чоралари кўрилади”, — дейилади мурожаатда.
Жамоат тартибини сақлаш, ёнғин ва бошқа фавқулодда вазиятларнинг олдини олиш самарадорлигини ошириш мақсадида, қўшимча видеокузатув камералари ўрнатилади ва Ягона мониторинг марказига интеграция қилинади.
Бозорлар, истироҳат боғлари ва хиёбонлардаги савдо обектлари индивидуал қўриқлаш бўйича сигнализация воситалари ҳамда улар жойлашган ҳудудлар “Ташвиш” тугмалари билан босқичма-босқич жиҳозланади. Ушбу обектларга қарашли майдонлар ва уларнинг ён-атрофида тушунтириш, тарғибот ишлари ҳамда фуқароларни огоҳликка чақиришга қаратилган чора-тадбирлар кучайтирилади.
Шунингдек, маҳаллаларда ҳуқуқбузарликнинг олдини олиш бўйича янги тизим ва амалиёт жорий этилиб, мулкий ва жамоат тартибига қарши қаратилган жиноятлар содир этилиши эҳтимоли юқори бўлган объектларда доимий кузатув йўлга қўйилади.
Аввалроқ Тошкент шаҳрида Миллий гвардия ходимлари жиноят содир этгани учун қидирувга берилган беш нафар шахсни кузатув камералари орқали аниқлаб, қўлга олгани тўғрисида хабар берилганди.
Изоҳ (0)