Ереванда бўлиб ўтаётган намойишда Арманистон собиқ президенти Роберт Кочаряннинг ўғли Левон Кочарян ҳибсга олинди. Бу ҳақда унинг адвокати Александр Кочубаевга таяниб, “Корреспондент.нет” хабар берди.

Адвокатнинг сўзларига кўра, Левон Кочарян махсус кучлар томонидан калтакланган, шундан сўнг у тез ёрдам бригадаси томонидан касалхонага ётқизилган. Россиянинг Mash Telegram канали ёзишича, бош вазир Никол Пашинянни импичментга чақирган мухолифат блоки раҳбари Андраник Теванян ҳам полиция бўлимига олиб кетилган.

Дасталбки маълумотларга кўра, полиция Москвадаги Ереван Plaza қурилишида иштирок этган қурилиш магнати ва Forbes рўйхатидаги миллионер Геннадий Степаняннинг ўғли Шагор Степанянни ҳам ҳибсга олган.

Аввалроқ Арманистон полицияси Ереванда кун давомида ҳукуматга қарши намойишлар чоғида 84 нафар намойишчи қўлга олингани ҳақида хабар берганди. Улар ҳуқуқ-тартибот идоралари ходимларининг қонуний талабларини бажармаганликда айбланмоқда.