Украина Россиянинг махсус ҳарбий самолётлар, раҳбарлар учун VIP транспортлар сақланадиган ўта “нозик” жойига ҳужум қилди. Бу ҳақда Буюк Британия Мудофаа вазирлиги ўзининг сўнгги разведка ҳисоботида маълум қилди.
Маълум қилинишича, гап 18 сентябрь куни Москва вилоятидаги Чкаловский аэродромига берилган зарба ҳақида кетмоқда. Унда икки номаълум диверсант камида иккита рус самолётини йўқ қилган.
Британия разведкаси сўнгги тўрт кун ичида Украина қўшинлари Россиянинг орқа қисмига интенсив ҳужумлар берганини ёзмоқда. Жумладан, Қрим, Краснодар ўлкаси ва Москвадаги Россиянинг логистика объектлари, авиабазалари ва қўмондонлик пунктларида портлашлар содир бўлган.
“Эҳтимол, Россия Қора денгиз флоти яна кучли нишонга айланган. Бироқ Москва яқинидаги Чкаловский авиабазасидаги портлашлар Россия раҳбарлари учун энг катта стратегик муаммо бўлиши мумкин”, — дейилади хабарда.
Британия Мудофаа вазирлигининг таъкидлашича, Чкаловский авиабазасидаги CООТ (Ил-20) махсус мақсадли самолётига етказилиши мумкин бўлган зарар ҳақидаги хабар, унинг разведка қобилияти ва нархини ҳисобга олган ҳолда актуалдир.
Мудофаа вазирлиги Россиянинг Украинага берган сўнгги йирик зарбалари Қрим ва Россиядаги махсус операциялар муваффақияти билан боғлиқ, деб ҳисоблайди.
“Бу Россия ва Қримдаги воқеаларга реакция бўлиши мумкин. Фронтдаги вазият нисбатан статик бўлгани учун ҳар бир томон ўз душманининг стратегик чуқурлигига зарба бериш орқали ўз манфаатларини кўзламоқда”, — дея хулоса қилади таҳлилчилар.
Изоҳ (0)