Индонезия суди 33 ёшли блогер Лина Лутфиаватини чўчқа гўшти егани акс этган TikTok видеоси учун икки йиллик қамоққа ҳукм қилди ва унга 16 минг доллардан ортиқ жарима солди, деб ёзмоқда New York Times.
Март ойида Лутфиавати ўзининг TikTok каналига жойлаган видеода унинг Балида чўчқа гўшти қўшилган таом еяётгани кўрсатилган. Овқатланишни бошлашдан олдин блогер “Бисмиллаҳ” деб айтган.
Икки миллионга яқин обуначига эга Лутфиавати видеоси аҳолисининг аксариятини мусулмонлар ташкил этадиган Индонезияда жанжалга сабаб бўлди. Мусулмон диний арбобларидан бири Лутфиаватини куфрда айблаб, унинг устидан полицияга шикоят қилди.
Сентябрь ойида Суматра оролидаги Палембанг шаҳри суди блогернинг ишини ўрганиб чиқди ҳамда уни қамоқ ва жаримага ҳукм қилди. Лутфиаватини айблаган дин арбобининг адвокати суд қарорига изоҳ берди.
“Қарор ушбу фуқаро учун давлатни ҳимоя қилиш, шов-шув кўтармаслик ва ҳар бир диний жамоани ҳурмат қилиш борасида дарс бўлди”, — деди у.
Лутфиаватининг ўзи видео учун бир неча бор узр сўраганини айтди.
“Қилган ишим нотўғри эканини биламан, лекин икки йиллик қамоқ жазосини кутмагандим”, — деди у.
Индонезия — дунёдаги энг кўп мусулмон аҳолига эга давлат. Унда 275 миллионга яқин одам истиқомат қилади, уларнинг деярли 90 фоизи ислом динига эътиқод қилади. 2000 йилларнинг бошидан бери, New York Times маълумотларига кўра, Индонезияда куфр ҳолатлари тобора кўпайиб бормоқда, уларнинг баъзиларига суд томонидан қамоқ жазоси тайинланган.
Изоҳ (0)