Кампиробод сув омборидан Фарғона шаҳрига тоза ичимлик суви тортилади. Бу ҳақда вилоят ҳокимлиги матбуот хизмати хабар берди.
Маълум қилинишича, Ҳайрулло Бозоров бошчилигидаги Фарғона вилояти делегациясининг Хитойга ташрифи давомида вилоятдаги ижтимоий муассасаларни қуриш ёки капитал реконструкция қилиш ҳамда Кампиробод сув омборидан Фарғона шаҳрига тоза ичимлик суви тортиш лойиҳалари борасида Хитойнинг Sinomach (China National Machinery Industry Corporation) холдинги билан дастлабки келишувларга эришилди.
Ушбу лойиҳаларга Хитой молия муассасалари томонидан камида 20 йил муддатга 300 миллион долларгача миқдорда ёки эквалентида долларда йиллик 3 фоизгача бўлган кредит ажратилиши кўзда тутилган.
Кампиробод сув омбори Ўзбекистоннинг Андижон вилояти ва Қирғизистоннинг Ўш ва Жалолобод вилоятлари чегарасида жойлашган. СССР парчаланганидан кейин сув омбори мустақил Қирғизистон ва Ўзбекистон ўртасидаги ҳудудий низо марказида бўлган. 2023 йил 30 ноябрь куни 30 йиллик муаммо ҳал бўлди: Шавкат Мирзиёев Ўзбекистон билан Қирғизистон ўртасидаги давлат чегарасининг алоҳида участкалари тўғрисидаги шартнома ҳамда Андижон (Кампиробод) сув омборининг сув ресурсларини биргаликда бошқариш тўғрисидаги битимни ратификация қилишга оид қонунларни имзолади.
Унга кўра, Ўзбекистонга 4957 гектардаги Андижон сув омбори ҳудуди ҳамда тўғонга хизмат кўрсатиш ва уни муҳофаза қилиш учун қўшимча 19,5 гектар ер майдони ўтказилди, Қирғизистонга эса компенсация тарзида 1019 гектар яйлов ерлари берилди.
Изоҳ (0)