АҚШ, Ўзбекистон, Қозоғистон, Қирғизистон, Тожикистон ва Туркманистон хавфсизлик, иқтисодиёт ҳамда энергетика соҳаларида ҳамкорликни чуқурлаштиради. Бу ҳақда 21 сентябрь, пайшанба куни Оқ уй сайтида чоп этилган баёнотда айтилади.
Ҳужжатда айтилишича, АҚШ ва Марказий Осиё давлатлари раҳбарлари Бирлашган Миллатлар Ташкилоти Бош Ассамблеяси доирасида C5+1 форматидаги саммитда хавфсизлик, иқтисодиёт ва энергетика соҳаларида ҳамкорликни мустаҳкамлашга келишиб олган.
“Биз минтақавий хавфсизлик бўйича умумий муаммоларни ҳал қилиш ҳамда Марказий Осиё давлатларининг суверенитети ва мустақиллигини қўллаб-қувватлашнинг муҳим пойдевори сифатида хавфсизлик соҳасидаги ҳамкорликни мустаҳкамлаш тарафдорлигимизни яна бир бор тасдиқлаймиз”, — дейилади Оқ уй баёнотида.
АҚШ Марказий Осиё давлатларида хавфсизликни мустаҳкамлаш учун молиялавий кўмакни оширишни, шунингдек, минтақадаги беш давлатга фойдали қазилмаларни қазиб олиш ва энергия хавфсизлигини мустаҳкамлашда ёрдам бериш учун мулоқот бошлашни режалаштирмоқда.
Байден, шунингдек, АҚШ ва Марказий Осиё ўртасида чегара хавфсизлиги, терроризмга қарши кураш ва ҳуқуқни муҳофаза қилиш фаолияти бўйича ҳамкорликни давом эттириш ниятида.
Маълумот учун C5+1 саммити АҚШ ва Марказий Осиёнинг беш давлати ўртасидаги умумий муаммоларни ҳал қилиш бўйича қўшма ҳаракатлар платформасидир.
Изоҳ (0)