Июль ойида “ғойиб бўлган” собиқ Хитой ташқи ишлар вазири Син Ган америкалик маъшуқаси туфайли ишдан бўшатилган. Бу ҳақда юқори лавозимли амалдорларнинг сўзларига таяниб, Тҳе Wалл Стреет Journal хабар берди.
Маълум қилинишича, Син Ган Хитойнинг Вашингтондаги элчиси бўлиб ишлаган вақтида никоҳдан ташқари алоқада бўлган. Аммо, афтидан, Хитой расмийлари бу ҳақда Ган 2022 йил декабрь ойида ташқи ишлар вазири лавозимига кўтарилганидан кейингина хабар топган.
Манбаларга кўра, Син Ган ҳозир тергов остида ва Хитой ҳуқуқ-тартибот идоралари билан ҳамкорлик қилмоқда. Терговчилар ишдан бўшатилган вазирнинг никоҳдан ташқари муносабатлари Хитой миллий хавфсизлигига путур етказган ёки йўқлигини текширмоқда.
Тергов Син Ганнинг Қўшма Штатлардаги элчи сифатидаги фаолияти давомидаги “интригалари”ни тасдиқлаган. Шунингдек, дипломатнинг Америкада ҳатто никоҳсиз фарзанди ҳам борлиги айтилмоқда.
“Америка Овози”нинг хабар беришича, 18 сентябрь куни бўлиб ўтган брифингда Хитой Ташқи ишлар вазирлиги вакили Мао Ниндан тегишли хабарлар ҳақида сўралган.
“Хитой томони Хитой ташқи ишлар вазирининг тайинланиши ва ишдан бўшатилиши ҳақида аввал ҳам маълумот тарқатган ва сиз айтаётган бошқа маълумотлар ҳақида билмайман”, — деган Мао Нин.
Таъкидланишича, тегишли савол ва унга жавоб Хитой Ташқи ишлар вазирлигининг расмий веб-сайтида доимо эълон қилинадиган брифинг стенограммасидан кесилган.
Ёзда Хитой ташқи ишлар вазири Син Ган узоқ вақт оммага кўриниш бермаганди. Бу унинг “соғлиғидаги ўзгаришлар” билан изоҳланган. Ган истеъфога чиққани кейинроқ маълум бўлган. У атиги олти ой ташқи ишлар вазири лавозимида ишлаганди.
Изоҳ (0)