Тайван Қуролли кучлари бир суткада Хитой армиясининг 103 та самолёти оролга яқинлашаётганини қайд этди, бу янги рекорд. Бу ҳақда Тайван Мудофаа вазирлиги хабар берди.
“17 сентябрдан 18 сентябргача Тайван атрофида Хитой халқ озодлик армиясининг 103 та самолёти ва 9 та кемаси аниқланди. Самолётлардан 40 таси Тайван бўғозининг ўрта чизиғини кесиб ўтган ёки Тайваннинг жануби-ғарбий ва жануби-шарқий ҳаво ҳужумидан мудофаа зоналарига кирган”, — дейилади хабарда.
Ҳарбий вазирлик Тайван Қуролли кучлари Хитой армиясининг ҳаракатини кузатиб тургани, самолётлар ва ҳарбий кемалар шай ҳолатга келтирилганини таъкидлади.
“ХХО армиясининг давом этаётган ҳарбий ҳаракатлари кескинликнинг кучайишига, шунингдек, минтақавий хавфсизликнинг ёмонлашишига олиб келиши мумкин, биз Пекинни масъулиятни ўз зиммасига олишга ва бир томонлама бузғунчи ҳаракатларни дарҳол тўхтатишга чақирамиз”, — деб таъкидлади Тайван Мудофаа вазирлиги.
Ўтган йили ёзда АҚШ Вакиллар палатаси спикери Ненси Пелоси Тайванга ташриф буюрганидан бери Хитой қўшинлари оролга мунтазам яқинлашмоқда. Хитой томони Тайванни ўз ҳудуди деб билади, шу сабабдан бошқа давлатлар расмийларининг ташрифини орол мустақиллигини қўллаб-қувватлаш сифатида баҳолайди.
19 август куни Хитой ҳарбийлари “сепаратистлар ва хорижий кучлар” ўртасидаги “тил бириктиришдан қаттиқ огоҳлантириш” сифатида Тайван атрофида машғулотлар бошлади. Бунга орол президентлигига номзод, вице-президент Лай Синденинг Парагвайга сафари чоғида қилган баёноти, сўнг транзитда АҚШга тўхтаб ўтгани сабаб бўлди.
“Тайван аллақачон Хитой республикаси деб номланган суверен, мустақил давлат. У Хитой халқ республикаси таркибига кирмайди. Хитой республикаси ва Хитой халқ республикаси бир-бирига бўйсунмайди. Мустақиллик эълон қилишнинг ҳожати йўқ”, — деган Лай.
Изоҳ (0)