Судан пойтахти Хартумда Судан армияси ва “Тезкор ҳаракат кучлари” (RCF) ўртасида шиддатли жанглар қайта бошланди, деб хабар берди дпа ахборот агентлиги 17 сентябрь, якшанба куни гувоҳларга таяниб.
Хартум, қўшни Баҳри ва Омдурман шаҳарларида оғир артиллерия ва ҳарбий самолётлар иштирокидаги жанглар шанба куни эрталабдан бери давом этмоқда. Судан армияси Хартум марказидаги армия штаб-квартирасига RCF ҳужумини қайтарганини ва RCF’нинг ўнлаб жангчиларини ўлдирганини айтди. RCF йўқотишлар ҳақида изоҳ бермади.
Пойтахтдаги жанглар оқибатида бир қанча бинолар, жумладан, нефть компаниясининг 18 қаватли минораси ёниб кетди, деб ёзади дпа.
Тинч аҳоли орасида қурбонлар ҳақида ҳеч нарса маълум эмас. Хартум маркази эвакуация қилинган, бироқ унинг атрофидаги турар жойларда ҳам жанглар кетмоқда, деб ёзади дпа.
Суданда жанг
Давлат раҳбари Абдулфаттоҳ Ал-Бурхон бошчилигидаги Судан армияси ва ҳарбийлаштирилган “Тезкор ҳаракат кучлари” (RCF) ўртасидаги жанглар 15 апрелдан бери давом этмоқда. Томонларнинг ҳеч бири ҳалигача устунликка эриша олмади ва ҳокимиятни тўлиқ қўлга киритмади. Вақти-вақти билан томонлар ўт очишни тўхтатиш бўйича келишиб турибди.
БМТ маълумотларига кўра, 250 мингга яқин одам мамлакатни тарк этган, 840 мингдан ортиқ киши эса ички ҳудудларга кўчган. Юзлаб тинч аҳоли қуролли тўқнашувлар қурбони бўлди, минглаб одамлар яраланди.
Изоҳ (0)