Россия президенти матбуот котиби Дмитрий Песков журналистларга Чеченистон раҳбари Рамзан Қодировнинг касаллиги ҳақида ҳеч қандай маълумот йўқлигини айтди. Бу ҳақда “РИА Новости” хабар берди.
“Президент администрацияси саломатлик ҳақидаги маълумотнома бериши даргумон”, — деди Песков.
Сўнгги пайтларда Рамзан Қодировнинг соғлиғида жиддий ўзгаришлар кузатилгани ҳақида хабарлар пайдо бўлди. Мухолифатдаги Чечен оммавий ахборот воситалари манбаларга таяниб, унинг комага тушгани ва ҳатто вафот этганини ёзди.
Украина Мудофаа вазирлиги Бош разведка бошқармаси вакили Андрей Юсов ҳам Қодировнинг касаллиги ҳақида маълумотни тасдиқлади. Эҳтимол, бу хабарларни рад этиш мақсадида Қодировнинг Telegram-каналида унинг боғда сайр қилгани акс этган видео пайдо бўлди. У қаерда ва қачон ёзиб олингани ноаниқ.
“Бизда ҳеч қандай маълумот йўқ. Ҳар ҳолда, президент администрацияси унинг соғлиғи ҳақида маълумот беролмайди. Шунинг учун айтарли гапимиз йўқ”, — деди Песков журналистларнинг Кремль Қодировнинг аҳволидан қай даражада хавотирда экани ҳақидаги саволига жавобан.
Бундан ташқари, Песков Қодиров гўёки якшанба куни Москвага Путин билан учрашиш учун учиб кетгани ҳақидаги хабарларга изоҳ берди.
“Россия президенти Владимир Путин билан ҳеч қандай учрашув бўлмаган”, — деб жавоб берди Песков.
Изоҳ (0)