Cobalt, Lacetti, Damas ва Labo учун шартномалар бериш бошланади — UzAuto Motors

Бугун, 18 сентябрь куни UzAuto Motors расмий сайтида кўрсатилган комплектация ва ранглардаги Chevrolet Cobalt, Lacetti, Damas ва Labo автомобиллари учун контрактация очилади. Бу ҳақда UzAuto Motors ахборот хизмати маълум қилди.

Айтилишича, бир ой аввал тузилган шартномалар бўйича дилерлик марказлари харидорларга Chevrolet Cobalt, Lacetti, Damas ва Labo автомобилларини муддатидан олдин етказиб беришни бошлаган.

“Ишлаб чиқариш ҳажмини ошириш бўйича кўрилган чора-тадбирлар самараси ўлароқ, барча мавжуд ранглардаги Chevrolet Cobalt, Lacetti, Damas ва Labo автомобилларининг қўшимча партиясини ишлаб чиқариш ва сотиш имкониятлари ҳам ишлаб чиқилди.

Қолаверса, аввал хабар берилганидек, компания автомобилларни етказиб бериш муддатини қисқартириш мақсадида ишлаб чиқариш жадвалига мувофиқ савдо тизимини жорий этмоқда. Шунингдек, барча тузилган шартномалар бўйича автомобиллар қисқа вақт ичида ўз эгаларига етказиб берилади.

Бугун, 18 сентябрь UzAuto Motors расмий сайтида кўрсатилган комплектация ва ранглардаги Chevrolet Cobalt, Lacetti, Damas ва Labo автомобиллари учун контрактация очилмоқда. Автомобильлар сони чекланган”, — дейилади компания ахборотида.

Эслатиб ўтамиз, агар бир шахс номига йилига бир хил модел учун 2 тадан ортиқ автомобиль харид қилинса, компания шартноманинг 3.1.2 бандига асосан автомобилларни етказиб бериш муддатини узайтиради. Шу муносабат билан, харидорлар шартномани имзолашдан олдин унинг барча бандлари билан тўлиқ танишиб чиқиш лозим.

Аввалроқ UzAuto Motors 4 август куни ишлаб чиқариш линияларида амалга оширилган модернизация ишлари, шунингдек, завод фаолияти самарадорлигининг ошиши ҳисобига 2023 йилда қўшимча 50 000 дона автомобиль ишлаб чиқариш имконияти яратилганини маълум қилган эди. Эртасига, 5 августда эса шартнома бериш тўхтатилгани маълум қилинганди.

Унга кўра, Chevrolet Lacetti, Cobalt ва Damas автомобилларининг 2023 йил учун қўшимча партиясига контрактациянинг дастлабки 2 кунида тўлиқ шартнома тузилди. 4–5 август кунлари ушбу автомобиль моделларини харид қилиш учун 50 000 дан ортиқ шартнома имзоланганди.