Ўзбекистон Марказий банки 18 сентябрдан бошлаб тижорат банклари учун валюта операцияларига қўйиладиган талабларни кучайтириши, эндиликда хўжалик юритувчи субъектларнинг чет эл валютасини сотиб олиш ва валюта операциялари билан боғлиқ амалиётлари фақат асосий ҳисобварақ очилган банклар орқали ўтказилиши хабар берилганди. Бугун, 16 сентябрь куни Марказий банкда бўлиб ўтган матбуот анжуманида Мамаризо Нурмуродов жамоатчиликнинг кескин норозилигидан кейин бу қарор бекор қилинганини айтди.
Куни кеча қабул қилинган қарор кескин музокараларга сабаб бўлди. Энг асосийси, бу қарор бўйича биз маълум бир ижобий қарашларни кўрмадик. Фалсафада шундай бир тушунча борки, жамият қабул қилмаган қарор — нотўғри қарор. У қайси мақсадга йўналтирилган бўлишидан қатъи назар… худди шу тамойилдан келиб чиқиб кечаси билан ўйлаб бу қарорни бекор қилдик, — деди Мамаризо Нурмуродов.
Марказий банк раисининг қўшимча қилишича, бу қарор орқали тижорат банкларига эҳтимолий хавфнинг олдини олиш учун кўрсатма берилган.
Марказий банк мустақил, буни таъминлаш керак дейсизлар-у, қарорларни жамият билан муҳокама қилиш кераклигини айтасиз. Жамият билан муҳокама қилинадиган қарорларимиз бор – у алоҳида. Бунда эса бевосита банкнинг фаолиятидаги камчилигини кўрсатиб, тўғрилашни айтяпмиз. Бунинг банк мижозига дахлдор жойи йўқ. Банк назоратни кучли қила олмагани учун, хавф келяпти, шунинг олдини олинг, деган маънода банкларга берилган кўрсатма эди, — деди Нурмуродов.
Изоҳ (0)