Бугун кечқурун Apple ўзининг анъанавий сентябр тақдимотини ўтказади — бу тақдимот шу йилги технология сферасида энг кутилган ва оммабоп воқеа бўлса ҳам ажабмас. Галдаги тадбир Wonderlust (“Мўжизани кутиш”) деб номланган. Ҳа, iPhone 15 оиласи фойдаланувчилар учун чинакам мўжиза бўлиши аниқ. Тақдимот Тошкент вақти билан соат 22:00 да бошланади ва уни Apple веб-сайтида, Apple TV орқали ёки Apple YouTube каналида, шунингдек, ушбу саҳифада ҳам кузатиб боришингиз мумкин:
Apple бугун кечқурун нимани намойиш қилиши сир эмас. Асосий янгиликлар доимгидек янги iPhone’лар бўлади. Яна катта ўзгаришлардан бири Lightning туйнуги тарихда биринчи бор USB-C портига алмаштирилган iPhone’ни кўрамиз. Apple бу ўзгаришни янгилик деб таъкидлаши мумкин, аммо биз (айфонманлар) ҳаммамиз жуда яхши тушунамизки, компания Европа Иттифоқининг универсал зарядлаш портига қўйган талаблари туфайли Lightning’дан воз кечишга мажбур бўлган.
Хуллас, тақдимотга қадар iPhone 15 ҳақида бир нечта аниқ маълумотлар бор. Булардан бири, стандарт iPhone 15 моделида илк бор Dynamic Island — фронтал камера учун қўшимча функционалларга эга кесим пайдо бўлади. iPhone 15 Pro ва Pro Мах сериялари дисплейлари LIPO технологиялари бўйича тайёрланади ва шу туфайли экран ҳошияси 0,7 мм.га юпқалашади ва унинг кенглиги бор-йўғи 1,5 мм бўлади.
Аввал таъкидлаб ўтганимиздек, барча Apple смартфонларида батарея қуввати ошиши кутилмоқда. Смартфонларнинг батарея қуввати ошганини мана бу iPhone 15 ва iPhone 14 бир-бирига солиштирилган суратдан билиб олсангиз бўлади:
Ундан ташқари iPhone 15ънинг аниқ вазни ва ўлчамлари маълум бўлди.
iPhone 15 ўлчамлари ва вазни:
- Қалинлиги: 7,8 мм
- Узунлиги: 147,6 мм
- Кенглиги: 71,6 мм
- Оғирлиги: 171 грамм (Яъни у эски моделга нисбатан бир граммга енгилроқ)
iPhone 15 Pro’нинг ўлчамлари ва вазни:
- Қалинлиги: 8,25 мм
- Узунлиги: 146,6 мм
- Кенглиги: 70,6 мм
- Оғирлиги: 188 грамм
iPhone 15 Prо Мах ўлчамлари ва вазни:
- Қалинлиги: 8,25 мм
- Узунлиги: 159,9 мм
- Кенглиги: 76,7 мм
- Оғирлиги: 221 грамм.
iPhone 15 Prо асосий версияда 128 Гб хотирага эга бўлади ва унинг нархи 999 долларни ташкил қилади. iPhone 15 Prо Мах’нинг нархи эса 100 долларга кўтарилиб, 1199 долларгача бўлади.
Изоҳ (0)