Тошкент шаҳрида янги уй-жойлар билан боғлиқ яна бир фирибгарлик содир этилгани айтилмоқда. Бу ҳақда “Дарё”га шикоят қилган бир гуруҳ фуқароларнинг айтишича, “Zohmir Group” номли қурилиш компанияси шаҳарнинг Яшнобод туманидаги янги қурилаётган 9 та хонадондан иборат уч қаватли уйларини 39 нафар фуқарога пуллаган. “Дарё” мазкур мурожаат юзасидан ўрганиш олиб борди.
Биз фирибгарлик қурбони бўлдик. “Zohmir Group” номли қурилиш компанияси томонидан алдандик. Бу компаниянинг рекламасига чув тушдик. Янги уйларга инвестиция киритинг, яхши уйларга эга бўласиз дейишганига уларга ишониб, пулларимизни нотариус орқали топширгандик. Шартномалар қилинди, кимдир пулини банк орқали тўлади, яна кимдир нотариус орқали қарз шартномалари қилиб, нақд шаклда тўлов қилди. Яна бошқа биров қурилиш молларига пул тикиб, уйга шу тарзда инвестиция киритди, — дейди қурилиш ташкилотига алданганини айтган Аваз Ёрмуҳаммедов.
Мурожаатчининг маълум қилишича, қурилаётган уйнинг олди-сотди қилиш шартномаси 2020 йил тузилган бўлиб, у 2 хонали уйга 190 миллион (ўша пайтдаги қийматга кўра, 17 минг доллар) тўлаган.
Қурилиш ташкилоти бизга ваъда қилган уйларни 2022 йилнинг май июнь ойида топшириши керак эди. Лекин 2023 йил келди ҳамки, уй қурилиши қандай ҳолатда бўлса, шундай турибди. Ҳеч нарса ўзгармаган. Биз айтилган муддатдан ўтгач, қурувчидан уйимиз қани, қачон тайёр бўлади деб сўраганимиздан сўнг, бошқа қизиқ-қизиқ муаммолар пайдо бўлмоқда. Аниқланишича, бизга сотилган уйлар яна 4-5 кишига сотилган экан — дейди мурожаатчи.
Суҳбатдошнинг аниқлаштиришича, қурувчи 9 та хонадонни 30 кишига сотган.
30 киши билан ҳам шу уй сизники деб, шартнома қилинган. Пуллари олинган. Биз бу ҳақда шу манзилга қатнайвериб, уй харидорлари бир-биримизни кўриб, гаплашганимиздан сўнг билдик, — дейди фуқаро.
Алданганини айтаётган фуқароларнинг билдиришича, улардан Азиз Алиев исмли масъул пулларни санаб олган.
Пулларимизни Азиз Алиев исмли киши олганди. Кейин билсак, улар кўпчилик экан. Улар уюшган гуруҳ тузиб, пулларимизни бошқа соҳага ишлатиб юборишганми, биздан қочиб юришибди. Уларни тополмаяпмиз. Шу сабаб Ички ишларга, прокуратурага мурожаат қилдик. Ҳозирча тергов ишлари кетяпти деган жавобни оляпмиз, — дейди суҳбатдош.
Пул тўлаб уй ололмаётган яна бир фуқаро Иброҳим Райимбоевнинг айтишича, у 2 хонали уй учун 25 минг доллар пулни олдиндан тўлаган.
Бу уйларнинг қурилиши аслида 2018 йил бошланган экан. Бу уйнинг асл эгаси Александр Кулик исмли фуқаро бўлган. Кейинчалик қурилишда муаммолар бўлгани сабаб “Zohmir Group” МЧЖ эгаси билан келишиб, олди-сотди шартнома қилишган экан. “Zohmir Group” МЧЖ кейинчалик бу хонадонларни 39 кишига сотган экан. Барчасига шартнома қилиб, алдов йўли билан пулларини ўзлаштирган. Шахсан ўзим 2 хонали уй учун 2021 йилнинг июнь ойида тўлиқ 25 минг доллар пул тўлаб қўйганман. Аслида бу уй қурилаётган ер ҳам олдинги эгаси номида экан. Уч йилдан бери бинода умуман ўзгариш йўқ. Қандай чала ҳолатда бўлса, худди шу ҳолатда турибди. Фақат томи ёпилди холос, — дейди Иброҳим Райимбоев.
Алданганини айтаётган фуқаронинг билдиришича, у уйга тўлов қилганидан сўнг, ҳар ҳафта қурувчига телефон қилиб, уй қачон битиши билан қизиққан.
Ҳар ҳафта телефон қилсам, бугун газни ҳал қиламиз, эртага кадастрни ҳал қиляпмиз деб ҳар сафар баҳона қиларди. Эртага учрашайлик, кадастр ҳужжатларини кўрсатаман деб, йўқ бўлиб кетарди. 2021 йилнинг июнь ойида уйга тўлов қилаётганимда уйни сентябрь, узоғи билан декабрь ойида тугатиб, ҳужжатлаштириб берамиз деганди. Аммо ҳозирги кунгача натижа йўқ, — дейди у.
.jpg)
Мурожаатчи Аваз Ёрмуҳаммедовнинг айтишича, мазкур қурилиш компаниясидан уй олиш ниятида тўлов қилган фуқаролар уй олиш учун яшаб турган хонадонларини ҳам сотган. Ва айни кунда кўчада қолмоқда.
2022 йилнинг 24 март куни МЧЖ раҳбарига уй учун тўлов қилганмиз. Ўша йилнинг июль ойида уйни топширамиз дейишганди. Лекин 2023 йил якунланяптики, уйдан дарак йўқ. Масалан мен тўлов қилган 20-уйнинг 3-хонадонини 5 кишига сотган. Қолган хонадонлар ҳам шу ҳолатда. Бу ерда фирибгарлик бўляпти. Фирибгарлик ҳақида 2022 йилнинг август ойида хабар топгандим. Ўшанда пулимни қайтаринг деганимда, ҳалигача қайтариб беришмади, — дейди яна бир мурожаатчи Зуфарбек Сатторов.
“Дарё” журналисти мазкур муаммо юзасидан фуқароларни алдагани айтилаётган Азиз Алиев билан суҳбатлашди. У бугунги кунга келиб, ундан норози бўлган фуқароларнинг пулларини қайтариб бераётганини айтмоқда.
Бу уйимиз аслида 5 қаватли бўлиши керак эди. Биз уни 3 қават қилиб қурдик. Уйнинг қаватлари сони ўзгаргач, лойиҳани ўзгартирдик. Шу сабаб фуқароларнинг пулларини вақтида қайтариб беролмадик. Айни кунга келиб, кўпчилигининг пулини қайтариб бердик, — дейди Азиз Алиев журналист билан телефон орқали мулоқотида.
Қурилиш ташкилоти раҳбари 39 кишидан пул олганини, анчасига маблағи қайтарилганини тасдиқлади. Аммо 9 та хонадон 39 кишига сотилганини рад этди.
Фарҳод ака, Сайфулло акаларнинг пулларини қайтариб бердик. Қолганларнинг пулини ҳам секин-аста қайтариб беряпмиз, — дейди чала қолган уй қурилишига масъул.
Уй-жой учун Азиз Алиевга нақд пул тўлаган фуқаролар нотариус орқали буни тасдиқлатиб, қарз шартномаси тузилганини билдирди. “Дарё”нинг бу ҳақдаги саволларига жавоб қайтарган нотариус қарз шартномаси фуқароларнинг уй учун тўлов қилганини тасдиқлаб, пулларнинг қачон қайтарилиши ҳам кўрсатилганини айтди.
Фуқароларнинг пул бергани қарз шартномаси орқали тасдиқланади. Ва бу пуллар қачон қайтарилиши лозимлиги ҳам шартномада кўрсатилган бўлади. Пул олди-бердиси нотариус орқали тасдиқлангани фуқароларнинг ютуғи бўлган аслида, — дейди “Дарё” журналисти билан суҳбатлашган нотариус.
“Дарё” воқеалар ривожини кузатишда давом этади.
Изоҳ (0)