G20 етакчилари Нью-Деҳлидаги саммитда қўшма декларация бўйича консенсусга эришдилар. Унда Украина ҳам тилга олинди. Бу ҳақда Тhе Guardian хабар берди.
Ҳиндистон бош вазири Нарендра Моди бу бўйича баёнот берди. У G20 блок олдида турган масалалар, хусусан, Украинадаги уруш масаласи бўйича консенсус декларациясини қабул қилганини айтди.
“Барча жамоаларнинг машаққатли меҳнати туфайли биз G20 етакчилари саммити декларацияси бўйича консенсусга эришдик. Мен ушбу декларация қабул қилинганини эълон қиламан”, — деди Моди.
Бунгача оммавий ахборот воситалари G20 давлатлари ўртасида қўшма коммюнике бўйича келишмовчиликлар юзага келгани, хусусан, Ғарб давлатлари Россиянинг Украинага қарши урушини қоралашни талаб қилгани, бироқ Москва буни блокировкалагани ҳақида хабар берди.
Bloomberg 10 сентябрь эрталаб G20 дипломатлари Украинадаги уруш бўйича тил топишга келишиб олгани ҳақида хабар берди. Бу раҳбарларга умумий декларацияни қабул қилиш имкониятини берди.
Декларация тафсилотлари
G20 саммитининг якуний декларацияси матнидаги асосий тезислар қуйидагилар:
- G20 барча давлатларни халқаро ҳуқуқ тамойилларига риоя қилишга, ҳудудий яхлитлик ва суверенитетни, халқаро гуманитар ҳуқуқни ҳурмат қилишга чақирди;
- Конфликтларни тинч йўл билан ҳал қилиш, дипломатия ва мулоқот ҳал қилувчи аҳамиятга эга;
- G20 Украинада БМТ Низомининг барча мақсад ва тамойилларига жавоб берадиган кенг қамровли, адолатли ва мустаҳкам тинчликни қўллаб-қувватлашга қаратилган барча конструктив ташаббусларни қўллаб-қувватлашга тайёр;
- Давлат раҳбарлари Украина ва Россияда озиқ-овқат ва ўғитлар етказиб беришни таъминлаш бўйича “дон келишуви”ни тўлиқ амалга оширишга чақирди;
- G20 ядро қуролидан фойдаланишга ва унга боғлиқ таҳдидларга қарши чиқди.
Изоҳ (0)