Бразилия президенти Луис Лула да Сильва россиялик ҳамкасби Владимир Путинни келаси йили Rio-де-Жанейрода бўлиб ўтадиган G20 йиғилишида иштирок этса, ҳибсга олмаслигини айтди. Бу ҳақда Reuters хабар берди.
Сиёсатчи Деҳлидаги G20 йиғилиши чоғида берган интервьюсида тегишли фикрни илгари сурган. У Россия президенти 2024 йилги тадбирга таклиф қилинишини айтган.
“Путиннинг Бразилияга бемалол келишига ишонаман. Сизга шуни айтишим мумкинки, агар мен Бразилия президенти бўлсам ва у Бразилияга келса, ҳеч қандай ҳолатда ҳибсга олинмайди”, — деди Лула.
Эслатиб ўтамиз, Халқаро жиноий суд 2023 йил март ойида Путинни уруш пайтида юзлаб болаларни Украинадан ноқонуний равишда депортация қилишда айблаб, ҳибсга олишга ордер берганди. Энди Халқаро жиноий суднинг Рим статутини ратификация қилган давлатлар Путин уларнинг ҳудудига қадам босса, ҳибсга олиши керак.
Изоҳ (0)