БМТ бош котиби Антониу Гутерриш Россия ташқи ишлар вазири Сергей Лавровга махфий мактуб ёзиб, унда Россия учун муҳим имтиёзлар билан дон битимига қайтишни таклиф қилди. Бу ҳақда Германиянинг Bild нашри хабар берди.
Таклиф Россияга қарши санкцияларни сезиларли даражада енгиллаштирадиган тўрт банддан иборат экани айтилади. Гуттериш SWIFT’дан узилган Россия Қишлоқ хўжалиги банкига қарши Европа Иттифоқининг молиявий санкцияларини бекор қилишни таклиф қилмоқда. Бунинг учун Россия банкининг RSHB Capital S.А деб номланган махсус ташкил этилган шўба корхонасидан фойдаланиш ва уни SWIFT тизимига улаш таклиф этилади.
Иккинчи пункт: Қора ва Азов денгизларида Украинанинг эҳтимолий ҳужумларидан дон экспорт қиладиган Россия кемаларини суғурталаш.
“Россиянинг озиқ-овқат ва ўғит экспортини БМТ томонидан қўллаб-қувватловчи Lloyd’s суғурта компанияси 4-6 ҳафта ичида ишга тушиши мумкин”, — дейилади хабарда.
Гутерриш нафақат “Россия озиқ-овқат ва ўғитлар экспорти учун юк суғуртаси”, балки каско суғурта ва P&I ни ҳам таклиф қилади.
Каско суғурта — юк ташийдиган кемалар учун суғурта, P&I эса учинчи шахсларга етказилган зарар учун тўлиқ жавобгарлик суғуртаси.
БМТ бош котибининг учинчи таклифи — Россия ўғит ишлаб чиқарувчиларининг Европадаги ҳисобларини блокдан чиқариш. Мактубда бу масала тегишли давлатлар ва Европа Иттифоқи раҳбарияти билан муҳокама қилиниши қайд этилган.
Тўртинчи пункт — “тезкор порт рухсатномалари орқали Европа Иттифоқи портларига озиқ-овқат ва ўғитларни ташийдиган Россия кемаларининг самарали киришини” таъминлаш.
“БМТ қишлоқ хўжалиги савдоси билан боғлиқ бўлган Россия кемаларининг Европа Иттифоқи портларига киришини осонлаштиришнинг кейинги вариантларини, шу жумладан, Россия портларини тарк этишдан олдин тегишли рухсатномаларни беришнинг соддалаштирилган тартибларини ўрганишга тайёр”, — дейилади мактубда.
Таъкидланишича, шу мақсадда Гутерришнинг БМТдаги вакиллари аллақачон Европа комиссияси ҳамда Германия, Бельгия, Испания ҳамда Нидерландия билан музокаралар олиб борган.
Изоҳ (0)