7 сентябрга ўтар кечаси Ростов вилоятида ҳаво ҳужумидан мудофаа кучлари иккита Украина дронини уриб туширди, деб хабар бермоқда Россия Мудофаа вазирлиги.
Вилоят губернатори Василий Голубевнинг сўзларига кўра, дронлардан бири Ростов-Доннинг ғарбий қисмида, иккинчиси эса шаҳар марказида Пушкинская кўчасидаги 42-уй яқинида қулаган.
Оқибатда учта бинонинг фасади шикастланган, ойналари синган. Яқин атрофда турган бир қанча машиналар ҳам зарар кўрган. Бир киши оёғи тирналган жароҳатлар билан тиббий ёрдам сўраган, аммо касалхонага ётишдан бош тортган.
.jpg)
Telegram каналларида Ростов марказида дрон портлаши лаҳзаси акс этган видео тарқалди. Қайд этилишича, портлаш Жанубий ҳарбий округ штаб-квартираси биноси яқинида содир бўлган.
Москва вилоятининг Раменский шаҳар округида яна бир дрон ҳаво ҳужумидан мудофаа кучлари томонидан уриб туширилди, деди Москва мэри Сергей Собянин. Унинг сўзларига кўра, дрон парчалари қулаган жойда ҳеч қандай вайронагарчилик ва жабрланганлар йўқ.
Маш нашрининг ёзишича, дрон Жуковский халқаро аэропорти яқинида қулаган. Портлаш оқибатида атрофдаги уйларнинг ойналари синган.
Брянск вилояти губернатори Александр Богомазнинг маълум қилишича, бир кеча-кундузда минтақада Украинанинг учта учувчисиз учоғи уриб туширилди. Унинг сўзларига кўра, дронлардан бирининг вайроналари Брянск темирйўл вокзали биносининг ойналари, вокзал майдони ва бир нечта вагонларга зарар етказган.
Россия Мудофаа вазирлиги 7 сентябрь куни соат 6:30 ва 7:00 да Брянск вилояти устида иккита дрон уриб туширилганини хабар қилди.
Изоҳ (0)