“Эртага кеч бўлади”: Қирғизистонда бурқа ва ниқоб кийишни тақиқлаш таклиф этилди

Қирғизистонда жамоат жойларида юзни тўлиқ қоплайдиган кийим кийишни тақиқлаш таклиф этилди. Бу ҳақда Kursiv хабар берди.

Депутат Шарапаткан Мажитова парламент йиғилишида тегишли таклифни илгари сурган. У Қирғизистон парламенти йиғилишида мамлакатда радикал диний оқимлар сони ортиб бораётганини айтди.

Мажитова Ўзбекистонда жамоат жойларида юзни беркитувчи ёки шахсни таниб олишни қийинлаштирадиган кийим кийишни тақиқловчи қонун қабул қилинганини таъкидлади.

“Масалан, қўшни Ўзбекистонда улар динга янада қаттиқроқ амал қиладилар, лекин уларнинг конституциясида Ўзбекистон республикаси дунёвий давлат экани, шунинг учун жамоат жойларида паранжида бўлиш тақиқлангани қайд этилган.

Қизлар мактабларда паранжида юришмайди. Уларнинг парламенти бу ҳақда қонун қабул қилди. Демак, бундай қонун ҳужжатларини қабул қилиш мумкин ва у диндорларнинг ҳуқуқларини бузмайди”, — деди у.

Мажитова рўмолга қарши эмаслигини қўшимча қилди. Лекин у аёлларнинг юзлари тўлиқ ёпилишини истамайди.

“Ўшда ҳар тўртинчи аёл паранжида. Уларнинг сони кундан кунга ортиб бормоқда. Шунинг учун Вазирлар Маҳкамасидан давлат даражасида чора кўришни сўрайман, акс ҳолда эртага кеч бўлади. Давлат хавфсизликни таъминлаш чораларини кўриши керак”, — дея хулоса қилди депутат.