Ўзбекистонда август ойида электр энергияси ва табиий газдан ноқонуний фойдаланиш натижасида тизимга 46 миллиард 229 миллион сўмлик зарар етказилгани аниқланди. Бу ҳақда Энергетика вазирлиги ахборот хизмати хабар берди.
Унга кўра, Энергетика вазирлиги ҳузуридаги “Ўзэнергоинспекция” томонидан ҳуқуқни муҳофаза қилувчи органлар ва электр ҳамда газ таъминоти корхоналари мутахассислари билан ҳамкорликда жойларда назорат тадбирлари ўтказиб келинмоқда. Хусусан, жорий йилнинг август ойида 785 та ҳолатда истеъмолчилар томонидан табиий газ ва электр энергиясидан ноқонуний фойдаланиш ҳолатлари аниқланди.
Бунда 29 миллион 104 минг метр куб табиий газ (26 миллиард 297 миллион сўм) ва 38,9 миллион кВт/соат электр энергияси (19 миллиард 932 миллион сўм) талон-торож қилиниши натижасида тизимга келтирилган 46 миллиард 229 млн сўм зарар ундиришга қаратилди.
Ноқонуний фойдаланишнинг энг кўп ҳолатлари Андижон, Бухоро, Самарқанд ва Тошкент вилоятлари ҳиссасига тўғри келади. Қоидабузар истеъмолчиларга нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза этувчи органларга тақдим қилинди.
Маълумот учун: ушбу ҳажмдаги табиий газ ҳозирги кунда 145 минг 520 та хонадоннинг, электр энергияси эса 194 минг 500 та хонадоннинг бир ойлик истеъмолига тенгдир.
Изоҳ (0)