Польшада ўқитувчилар иш ҳақини оширишни талаб қилиб намойишга чиқди

Польша ўқитувчилари ўқув йилининг биринчи куни Варшавадаги Миллий таълим вазирлиги биноси ёнида норозилик акциясига йиғилди.

Акция Польша ўқитувчилари уюшмаси томонидан ташкил этилган бўлиб, унинг чақириғи билан жума куни Шуха кўчасида жойлашган кафедра биноси ёнида Варшава ҳамда мамлакатнинг бошқа вилоятларидан келган бир неча минг ўқитувчилар йиғилди.

Намойишчиларнинг асосий талаби — мамлакатдаги энг паст маошлардан бири бўлган ўқитувчилар иш ҳақини ошириш. Улар ўзлари билан олиб келган плакатларда “Оч қолган ўқитувчи ҳеч нарса ўргатмайди”, “Ўқитувчилар камбағал, чунки (ҳукмрон партия раиси Ярослав) Качинскийнинг фарзанди йўқ”, “Пулларимиз қани?” деб ёзилган. 

“Бизда рекорд даражадаги инфляция ва таълим соҳасида рекорд даражада паст маошлар мавжуд. Бугунги кунда ўқитувчининг маоши энг кам иш ҳақидан атиги 90 злотий юқори, ўқиш ва иш шароитлари ёмонлашмоқда, ўқитувчилар етишмайди. Вақт ўтган сари бундан ҳам ёмон бўлади. Чунки ҳозирги ўқитувчилар қариб қолган”, дейилади ташкилотчилар баёнотида.

Польша ўқитувчилар уюшмаси маълумотларига кўра, ҳозирда мамлакатда 18 минг нафар мактаб ўқитувчиси етишмайди.