Актриса Замира Бешимова “Дарё”нинг YouTube’даги каналига берган интервьюсида собиқ турмуш ўртоғи томонидан зўравонликка учрагани ва у билан хиёнат қилган дугонаси билан бугунги муносабатлари қандай эканига ойдинлик киритиб ўтди.
— Ростини айтиш керак, у пайтда менга ҳам осон бўлмаган. Мен ўқиган, аёллар ҳуқуқлари ва гендер тенглиги бўйича хотин-қизларга семинар тренинглар ўтган бўлсам-да, қийин кунларни бошдан кечирганман. Икки йил давомида руҳий зўравонлик, камситиш ва қўл кўтариш ҳолатлари бўлган бўлса-да, бу ҳақида ҳеч кимга айтганим, ўзимни ҳимоя қилишга уринганим йўқ. Чунки жамиятнинг ўзи аёлларни шундай яшашга мажбур қилар экан. Яъни бизда аёллар маълум бир қолип бўйича яшашга мажбур. Сиз аёл, келин ва онамисиз, демак, индамай ҳаммасига чидашга мажбурсиз, деб мажбур қилишади.
Оилам тинч бўлишини истаб, ҳаётимдаги муаммоларни ҳатто онамга айтишни ҳам истамаганман. Чунки жамиятимизда ажрашдими, демак бир балоси бор, ҳамма айб аёл кишида деган тамғадан қўрқиб, ҳаммасини ичимга ютдим. Мен-ку, ҳаётда ўз ўрнини топиб, шундай зулмга чидаган бўлсам бошқа аёллар қандай яшаркан, деб кўп ўйлайман. Чунки 16 ёшида ота-онасининг қистови билан турмушга чиққан, ўқимаган, қўлида касб-кори йўқ аёллар оз эмас.
Яқинда келинчакнинг турмуш ўртоғи томонидан уриб ўлдиргани ҳақидаги хабарни ўқиб, бир неча кун ўйладим. У аёл эндигина институтнинг иккинчи босқичида таҳсил олар экан. Бўлажак шифокорни ўзидан 10 ёш катта йигитга турмушга беришган. Энг қизиғи, у илмга алоқаси бўлмаган соҳада фаолият юритар экан. Қиз бир неча марта оилавий муҳитидан нолиб, ота-онасига қўнғироқ қилган. Аммо унинг ҳам яқинлари бошқа ота-оналар сингари “Чида, ҳаммаси изига тушиб кетади”, деб юпатишган. Натижа эса бир бегуноҳ инсоннинг ўлими билан якунланди. Рости шу хабарлар ҳақида эшитганимда, ҳаётимдаги баъзи воқеалар қайта жонланади. У қиз-ку ота-онасига айтишга ўзида куч топибди, мен эса ҳаётда кўп қийналган онамга бу ҳақида айтишга ҳам, журъат қилолмаганман. Кўзим кўкариб, тирналиб кўчага чиққанимда ҳам атрофдагилар ҳаётим ҳақида сўрашса, ўзимни бахтлидек кўрсатишга, кулиб ҳаммаси яхши эканига ишонтиришга ҳаракат қилардим, — дейди актриса Замира Бешимова.
Актриса оилаларнинг ажрашишига нималар сабаб бўлаётгани ва хиёнатларнинг илдизи нималарга бориб тақалиши ҳақида ҳам ўз мулоҳазаларини айтиб ўтди.
.jpg)
— Аввалига ҳаммаси яхши бўлади. Афсуски, орадан вақт ўтиб, аёл ҳомиладор бўлиб фарзандли бўлганидан кейин инқироз даври бошланади. Аёл она бўлгач, масъулиятни ўз зиммасига олади. Шу кунга қадар аёлидан меҳр олиб юрган эркак бирдан ёлғизликни ҳис қилади. Айнан шу даврдан бошлаб эр ва хотин муносабатлари бузилишни бошлайди. Эрга меҳр керак, аёл эса боласи, рўзғор ишларидан ортмай қолади. Эркак киши жисмонан етук бўлиши мумкин, аммо кўп ҳолларда оила қуришга руҳан тайёр бўлмайди. Шу боис ўғил болаларни уйлантиришга шошмаслик керак. Оилага руҳан тайёр бўлмаган оилаларда ажралиш ҳолатлари кўп учрайди, — дейди актриса.
Замира Бешимова собиқ турмуш ўртоғини йўлдан урган дугонасини кечиргани ҳақида ҳам сўзлаб берди.
— Қизиғи шундаки, у дугонам билан ҳозир мулоқотдаман. Тўғри, аввалгидек яқин муносабатда эмасмиз, аммо уни кечирганман. Анча хато ва қийин кунларни бошидан кечирди, нималар қилганини ҳам англади. Менимча, ўтган ишлардан ўзига тегишли хулосани олди. Шундай деб ҳисоблаганим учун ҳам уни кечирдим ва алоқаларни тикладим. Аммо аввалгидек оиламга яқинлашишини истамайман. Биласизми, ҳаётда англаган ҳақиқатим шундаки, инсон кечиримли бўлиши ва қалбида гина сақламаслиги керак, — дейди актриса Замира Бешимова.
Изоҳ (0)