Буюк Британия ташқи ишлар вазири Жеймс Клеверли билан Хитойга борган амалдорларнинг компьютерлари “тозаланади” ва сафар давомида уларга берилган телефонлар йўқ қилинади. Бу ҳақда “Daily Mail” хабар берди.
Таъкидланишича, Британия делегациясининг барча аъзолари Хитойга сафари олдидан бир неча ҳафта давомида хавфсизлик бўйича тренингдан ўтган. Тренингда Хитой махсус хизматларининг иш услублари ҳақида сўзлаб берилган. Хусусан, меҳмонхона хоналарида мулоқотни тинглаш, компьютер ва смартфонларни ишдан чиқариш, шунингдек, чиройли аёллардан ўғирлик ва шантажда фойдаланиш каби.
Британиянинг Миллий киберхавфсизлик маркази тавсиясига кўра, делегациянинг барча аъзоларига сафарга шахсий смартфон ва ноутбукларини олиб кетмаслик буюрилган. Уларга махсус харид қилинган янги қурилмалар берилган. Британияга қайтгач, барча давлат компьютерларининг қаттиқ дисклари тозаланади, жосуслик дастурлари таҳдиди туфайли “бир марталик” телефонлар йўқ қилинади.
Эслатиб ўтамиз, 30 август куни Жеймс Клеверли Пекинга етиб келди. Бу Британия ташқи ишлар вазирининг сўнгги беш йил ичидаги Хитойга биринчи ташрифи ҳисобланади.
Изоҳ (0)