Украина президенти Владимир Зеленский уруш давридаги коррупцияни давлатга хиёнат билан тенглаштирувчи қонун лойиҳасини тайёрламоқчи. Бу ҳақда “Украина ҳақиқати” хабар берди.
“Мен ўз олдимга вазифа қўйганман, коррупцияни уруш давридаги давлатга хиёнат билан тенглаштириш бўйича таклифларим Украина қонун чиқарувчисига тақдим этилади. Бундай усуллар жамиятда доим иш бермаслигини тушунаман, лекин уруш пайтида бу ёрдам беради, деб ўйлайман”, — деди Украина раҳбари журналист билан интервьюсида.
Зеленскийнинг сўзларига кўра, тегишли қонунчилик ташаббуси келаси ҳафта Олий Радага юборилади.
“Кейин гап парламентда қолади”, — деди у.
Украина Жиноят кодексида давлатга хиёнат учун мол-мулки мусодара қилинган ёки мусодара қилинмаган ҳолда ўн икки йилдан ўн беш йилгача озодликдан маҳрум қилиш тарзидаги жазо назарда тутилган.
Жиноят кодексининг “Ноқонуний бойлик орттириш” банди мол-мулки мусодара қилинган ҳолда уч йилгача муайян лавозимларни эгаллаш ёки муайян фаолият билан шуғулланиш ҳуқуқидан маҳрум қилади, шунингдек, беш йилдан ўн йилгача муддатга озодликдан маҳрум қилиш жазосини назарда тутади.
Изоҳ (0)