Россия ихтиёрида ҳозир камида 585 та ракета (Х-22 ни ҳисобга олмаганда) мавжуд бўлиб, улар 500 километрдан кўпроқ масофани босиб ўтади, мазкур ракеталар ёрдамида Россия қўшинлари Украинанинг турли минтақаларига ҳужум қилмоқда. Бу ҳақда “РБК-Украина”га Украина Мудофаа вазирлиги Бош разведка бошқармаси (ГУР) вакили генерал майор Вадим Скибицкий маълум қилди.
Унинг сўзларига кўра, ГУР Россиянинг ракета захиралари ва уларни ишлаб чиқариш билан боғлиқ барча ҳаракатларни диққат билан кузатяпти.
“Искандер” баллистик ва қанотли ракеталари ҳақида гапирадиган бўлсак, биздаги маълумотларга кўра, ҳозирда тахминан 270 дона қолган. “Калибр” захиралари тахминан 140 та. Х-101 ракеталари нисбатан кам, шу билан бирга, Х-101, Х-555 ва Х-55 жанговар каллакли ракеталарининг сони, бизнинг ҳисоб-китобларга кўра, 100 га яқин, — деди Скибицкий.
Бундан ташқари, унинг сўзларига кўра, Россия захираларида тахминан 75 дона “Кинжал” қолган бўлиши мумкин.
ГУР вакилининг қўшимча қилишича, бугунги кунда руслар Х-101 ракеталаридан ўтган йил куздагига нисбатан камроқ фойдаланмоқда. Бунинг иккита сабаби бор.
Афтидан, режага кўра, россияликлар ойига 40 га яқин Х-101 ракеталарини ишлаб чиқариши мумкин, аммо биз бу режалар бажарилмаётганини яхши биламиз. Бу, биринчи навбатда, хорижий компонентларнинг етишмаслиги билан боғлиқ. Иккинчи омил шундаки, Россия ушбу ракеталарни захирага олишга уринмоқда. Чунки улар биз муваффақиятли уриб туширган Х-555, Х-22 қанотли ракеталари ёки ҳатто “Калибр” ракеталари билан солиштирганда аниқроқ ва самаралироқ, — дея тушунтирди Скибицкий.
Эслатиб ўтамиз, 28 августга ўтар кечаси Россия қўшинлари Украинанинг Полтава вилоятидаги саноат объектига зарба берди. Ҳужумда “Калибр” қанотли ракеталари ва Х-59 дан фойдаланилган.
Изоҳ (0)