Туркия жанубидаги Караман вилоятида сайёҳлик автобуси йўл-транспорт ҳодисасига учради. Бу ҳақда Sputnik хабар берди.
Маълум қилинишича, ҳодиса оқибатида 26 киши жароҳат олган. Уч нафар жабрланувчи Эрменек давлат касалхонасига ётқизилган. Уларнинг аҳволи оғир.
“Караманда тур автобусининг ағдарилиши оқибатида 26 киши жабрланди”, — дейилади хабарда.
Автобус экскурсия пайти тоғ ёнбағрига кира олмаган ва сирпаниб кетган. Ҳайдовчи бошқарувни йўқотган, транспорт йўл четидаги уйлардан бирининг боғига ағдарилиб кетган. Жабрланганлар орасида, дастлабки маълумотларга кўра, бир нафар Озарбайжон фуқароси бор, қолганлари маҳаллий аҳоли экани айтилмоқда.
21 августга ўтар кечаси Туркиянинг Ёзгат вилоятида йўловчи автобуси жарликка учиб кетган. Ҳодиса оқибатида 12 киши ҳалок бўлган, 19 киши тан жароҳати олган. Автоҳалокатга автобус ҳайдовчисининг эҳтиётсизлиги сабаб бўлган.
10 август куни Истанбулнинг Эюпсултон туманида аэропорт қурилишида иштирок этган ишчиларни олиб кетаётган автобус ағдарилиб кетганди.
30 июль куни Карс вилоятида юз берган ҳалокатда ҳайдовчи бошқарувни йўқотиб қўйган ва автобус 50 метрлик қоядан қулаганди. Оқибатда етти киши ҳалок бўлган, яна 22 киши жароҳатланган.
Изоҳ (0)