АҚШ расмийлари Россияга мунтазам дронлар ҳужумини Украинанинг секин бораётган қарши ҳужуми фонида Киев ҳамон жавоб қайтариш қобилиятига эга эканини халққа намойиш этмоқчилиги билан боғлади. Бу ҳақда The New York Times хабар берди.
NYT суҳбатдошларининг фикрича, агар бундай тактика стратегик мақсадни ҳам кўзласа, бу украиналик аҳоли ва қўшинлар руҳини кўтаради. Нашр Украина Бош разведка бошқармаси вакили Андрей Юсовнинг сўзларига ишора қилиб, Киев Москвага дронлар ҳужуми давом этишини билдирган бўлса-да, ҳужум учун жавобгарликни бевосита ўз зиммасига олмаётганини ёзди.
Июнь ойида Киев қарши ҳужумга ўтди, бироқ Украина қўшинлари Россия мудофаасини ёриб ўтишга қийналмоқда, техника ва қўшинларда катта йўқотишларга дуч келмоқда. Жанг майдонида бир оз муваффақиятга эришган Украина дрон ҳужумларини кучайтирди, деб таъкидлайди NYT. Газета ёзишича, Украина ўз ҳудудида ишлаб чиқарилган дронлардан фойдаланяпти.
АҚШ Россия ҳудудига учувчисиз учоқлар ҳужумига бир неча бор эътироз билдирган. Июль ойидаги бирифингда Оқ уй матбуот котиби Карин Жан-Пьер Вашингтон “Россия ичидаги ҳужумларни қўллаб-қувватламаслигимизни аниқ қилиб билдирган” деганди.
Москвага дронлар ҳужуми
Сўнгги бир неча ҳафта ичида Москва ва Москва вилояти мунтазам равишда учувчисиз учоқлар ҳужумига учради. Хусусан, 21—22 август кунлари Москва вилоятида дронлар уриб туширилди, 18 августда эса Москва шаҳри яқинидаги нотурар жой биносига учувчисиз учоқ қулади.
23 августга ўтар кечаси ҳужумчи дрон “Москва Сити”гача келди ва ҳудуддаги қурилиши битмаган бинога урилди.
26 август куни тонгда Россия Мудофаа вазирлиги “Украина ҳарбийлари самолёт типидаги дрон ёрдамида” Москва ва Москва вилоятидаги нишонларга зарба беришга уринганини маълум қилди.
Изоҳ (0)