Дания ҳукумати жамоат жойларида диний матнларни таҳқирлашни тақиқловчи қонун лойиҳасини тақдим этади. Бу ҳақда Дания адлия вазири Питер Ҳуммелгаардга таяниб, Reuters хабар берди.
Парламент ҳужжатни қачон кўриб чиқиши ҳозирча номаълум.
“Ҳукумат диндорлар учун катта диний аҳамиятга эга бўлган предметларга нотўғри муносабатда бўлишни тақиқловчи қонун лойиҳасини таклиф қилади. Масалан, Қуръон, Инжил ёки Тавротни оммавий равишда ёқиш учун жазо жорий этилади”, — деди Дания адлия вазири.
Ҳуммелгаард Қуръонни ёқишни тақиқлаш сўз эркинлигини бузади, деган Даниянинг етти мухолифат партияси вакилларига жавоб қайтарди.
“Менимча, шахсий фикр-мулоҳазаларни билдиришда предметларни ёқишдан кўра сивилизацион усуллар мавжуд”, — деди Адлия вазирлиги раҳбари.
Тақиқни бузганлик учун жарима ёки икки йилгача қамоқ жазоси берилиши кутилмоқда.
Ёзда Данияда, шунингдек, Швецияда ўта ўнг миллатчилар иштирокида кўплаб акциялар ўтказилди, унда Қуръон нусхалари ёқиб юборилди ёки бошқача усулда таҳқирланди. Бу мусулмон мамлакатларида норозилик уйғотди, улар Дания ва Швеция расмийларидан бундай ҳаракатларни тақиқлашни талаб қилди.
Июль ойида Дания хорижий давлатларнинг Даниядаги элчихоналари олдида Қуръон нусхаларини ёқишнинг олдини олиш учун қонуний чора топишини айтди. Швеция ҳам Қуръонни таҳқирлашни қонуний чеклаш йўлларини ўрганаётганини билдирди.
Қуръоннинг ёқиб юборилишига оид сўнгги маълумотлар
- Январь ойида Стокгольмдаги Туркия элчихонаси олдида Қуръон ёқиб юборилганди. Акцияни ултраўнг ва исломга қарши “Қаттиқ курс” партиясининг даниялик-швед фаоли Расмус Палудан бошқарган.
- Апрель ойида Швеция маъмурий суди мамлакат Ташқи ишлар вазирлиги томонидан Қуръон ёқиб юборилган намойишларга қўйилган тақиқни бекор қилган. Суд ўз қарорида йиғилишлар ва намойишлар ўтказиш эркинлиги конституциявий ҳимояланган ҳуқуқлар эканини келтирган.
- Июнь ойида ироқлик муҳожир Стокгольмдаги бош масжид ёнида Қуръонни ёқиб юборган.
- Июль ойида Швеция полицияси Стокгольмдаги Ироқ элчихонаси олдида Қуръон ва Ироқ байроғи ёқиб юборилган норозилик намойишини ўтказишга рухсат берган. Шундан сўнг юзлаб одамлар Швециянинг Бағдоддаги элчихонасига бостириб кириб, бинога ўт қўйган.
- Намойишчиларни тарқатиш учун Ироқ полицияси сув пуркагичлардан фойдаланган. Ироқ мамлакатдан Швеция элчисини ҳайдаган ва яна муқаддас китоб ёқиб юборилса, дипломатик алоқаларни узишини билдирган. Шундан сўнг Ироқнинг Даниядаги элчихонаси олдида Қуръон ёқиб юборилган. Намойишчилар буни Швециянинг Бағдоддаги элчихонасига яқинда уюштирилган ҳужумга норозилик сифатида амалга оширганини айтган.
- Август ойи бошида Стокгольмда эронлик аёл полиция ҳимоясида Маларен кўли қирғоғида мангалда Қуръонни ёқиб юборган. У “барча динларни йўқ қилиш” кераклигини айтган.
- Август ойи ўрталарида Швециянинг Стокгольм шаҳрида полиция ҳимояси остида яна муқаддас Қуръон китоби ёқиб юборилди. Бунинг олдини олишга уринган эркак эса ҳибсга олинди. Намойишга ироқлик муҳожирлар бошчилик қилган. Улар аввал Қуръон нусхасини тепиб, устига сакраган, кейин эса уни бутунлай ёқиб юборган.
Изоҳ (0)