Туркия президенти Ражаб Тоййиб Эрдўғон россиялик ҳамкасби Владимир Путин билан учрашиш учун Россияга боради. Бу ҳақда Yeni Safak хабар берди.
Дастлаб Эрдўғоннинг идораси Путиннинг Туркияга келишини даъво қилган, бироқ Кремль учрашув жойи ҳали аниқланмаганини қайд этган.
Томонлар икки томонлама муносабатлар, Украина ва дон битимини муҳокама қилишни режалаштирмоқда. Нашрнинг ёзишича, Эрдўғоннинг ташрифи ғалла бўйича келишувни амалга оширишни давом эттириш учун муҳим қадам бўлади.
“Туркия президенти идораси Россия иштирокисиз дон битимини узайтиришни ноўрин, деб ҳисоблайди. Шу нуқтаи назардан, келишувни аввалги форматда давом эттириш масаласи Эрдўғон учун муҳим ҳисобланади”, — дейилади хабарда.
Яқин кунларда Туркия ташқи ишлар вазири Хоқон Фидан Россияга ташриф буюриши кутилмоқда.
Путин ва Эрдўғон учрашуви
2 август куни телефон суҳбатлари якунида Туркия ва Россия етакчилари юзма-юз учрашув ўтказишга келишиб олди. Эрдўғоннинг идораси Россия президентининг Туркияга ташриф буюришга розилигини даъво қилди.
Бироқ Кремль музокаралар Туркияда бўлиши шарт эмаслиги, Путин ҳозирги шароитда “мамлакатда бўлиши кераклиги” ва “унинг ташрифини ташкил этиш қийинлигини” таъкидлади.
Туркия матбуоти Путиннинг Туркияга август охири ёки сентябрь бошида ташриф буюришини ёзган.
21 август куни Ражаб Тоййиб Эрдўғон сентябрь ойида G20 саммити ёки БМТ Бош Ассамблеяси доирасида россиялик ҳамкасби билан шахсан учрашишга умид қилаётганини айтган. Шу билан бирга, Путин ушбу тадбирларда иштирок этишини ҳали тасдиқламаган.
Изоҳ (0)