Россияда номаълум дрон стратегик бомбардимончи самолётлар жойлашган “Шайковка” ҳарбий аэродромига ҳужум қилди. Бу ҳақда Россия оммавий ахборот воситаларига таяниб, “РБК-Украина” хабар берди.
База маълумотларига кўра, 21 август куни эрталаб камикадзе дрони аэродром ҳудудига қулаган. Оқибатда аэродромдаги самолёт шикастлангани айтилмоқда. Жабрланганлар ва инфратузилмага бошқа зарар етказилмаган.
Ўз навбатида, Калуга вилояти губернатори Владислав Шапша дрон ҳужуми қайтарилгани ҳақида маълум қилган.
Маsh Telegram канали “Украина дрони” 21 август эрталаб соат саккизларда аэродром ҳудудига қулаганини ёзмоқда.
“Бу фуқаролик коптери бўлиб, у ўз вақтида аниқланган ва уриб туширилган”, — дейилади хабарда.
Дрон ҳалокатга учраган жойда чуқурлик ҳосил бўлган ва ёнғин келиб чиққан, у Фавқулодда вазиятлар вазирлиги иштирокисиз одамлар томонидан ўчирилган.
Россияга охирги дрон ҳужуми
21 август куни эрталаб Москвага яқинлашаётган “Украина дрони электрон уриш воситалари ёрдамида бостирилгани” маълум қилинди. Ҳолат юзасидан Внуково ва Домодедово аэропортларида рейсларни қабул қилиш ва жўнатишга вақтинча чекловлар жорий этилди.
Хавфсизлик нуқтаи назаридан соат 06:25 дан (Тошкент вақти билан 08:25) бошлаб рейсларнинг бир қисми бошқа аэропортларга йўналтирилди. Уларнинг фаолияти соат 10:30 дан тўлиқ тикланди.
Сўнгги бир неча ҳафтада Москва ва Москва вилояти мунтазам равишда дронлар ҳужумига учрамоқда
20 август куни Москва мери ва Россия Мудофаа вазирлиги “Жануб йўналиши бўйича Москвага дрон ҳужумининг олди олингани”ни маълум қилди. 18 августга ўтар кечаси Москва марказидаги Экспомарказ ҳудудига ҳаво ҳужумидан мудофаа тизими томонидан йўқ қилинган учувчисиз учоқ парчалари тушди.
Дронлар аниқланганда, Москва ҳаво узелининг аэропортлари (Внуково, Домодедово, Жуковский ва Шереметево), қоида тариқасида, рейсларни қабул қилиш ва жўнатишни вақтинча тўхтатади.
Изоҳ (0)