Адлия маслаҳатчиси Музаффар Рашидов Халқ депутатлари Қибрай тумани Кенгашининг қарори билан туман ҳокими этиб тайинланди. Бу ҳақда Тошкент вилояти ҳокимлиги матбуот хизмати хабар берди.
Музаффар Рашидов 1987 йили Тошкент вилояти Зангиота туманида туғилган. Маълумоти – олий. 2009 йилда Тошкент давлат юридик институтини тамомлаган.
Лавозимга тайинлангунга қадар, Оҳангарон тумани прокурори лавозимида ишлаб келаётган эди.
Август бошларида президент Шавкат Мирзиёев Қибрай тумани ҳокими ва Янгийўл тумани ҳокими ҳамда ушбу туманларнинг 4 та сектор раҳбарларини лавозимидан олганди.
Шунингдек, Одилжон Атауллаев Халқ депутатлари Янгийўл тумани кенгашининг қарори билан туман ҳокими этиб тайинланди.
Одилжон Атауллаев 1980 йилда Сурхондарё вилояти Денов туманида туғилган. Маълумоти олий. 2008 йил Андижон давлат университетини тамомлаган. Лавозимга тайинлангунга қадар Нурафшон шаҳри камбағалликни қисқартириш ва бандликка кўмаклашиш бўлими раҳбари вазифасида ишлаб келаётганди.
Бундан олдин Оҳангарон туманининг собиқ ҳокими Зоир Мирзаевга биринчи ўринбосар бўлгани тўғрисида хабар берилганди.
Изоҳ (0)