Майами полицияси шаҳар кўчаларида жиноятчилардан тортиб олинган қуролларни Украина миллий полициясига топширди. Бу ҳақда Украина полицияси матбуот хизмати хабар берди. Қуролларни топшириш маросими Майами билан биродар-шаҳар статусини олган Ирпенда бўлиб ўтди.
“Бугунги тадбир Украина полицияси учун катта аҳамиятга эга. Кўчада босқинчилардан тортиб олинган қуроллар жиноят қуроли сифатида ишлатилиши мумкин эди. Аммо, бизнинг бўлинмаларимизга ўтказилган ушбу қуроллар тартиб ва хавфсизликни сақлаш, украиналикларни ҳимоя қилиш воситасига айланади”, — деди Миллий полиция раҳбари ўринбосари Геннадий Федорюк.
Майами полицияси бошлиғи Мануэл Моралес қурол-яроғларнинг топширилишини Америка полицияси учун улкан шараф деб атади ва Украина полициясини ҳар томонлама қўллаб-қувватлашга ваъда берди. Майами полицияси, шунингдек, Ирпендаги туман полиция бўлимини тиклашга ёрдам берган.
Украина миллий полицияси олинган қуролларнинг моделларини ошкор қилмади. Хабарга илова қилинган расмларда тўппонча, револьвер ва автоматларнинг турли моделларини кўриш мумкин.
Украина халқ депутати Мариан Заболоцкийнинг аниқлик киритишича, Майами полицияси 101 дона қурол топширган, яқин орада АҚШнинг бошқа шаҳридан Киевга 600 дан ортиқ қурол олиб келиниши кутилмоқда.
Изоҳ (0)