Мисрдан гепатит C га қарши дори воситаларининг 13-партияси Ўзбекистонга етказилди

Мисрдан гепатит C га қарши дори воситаларининг ўн учинчи партияси 12 август куни Ўзбекистонга етказилди, деб хабар бермоқда “Дунё” АА.

Маълум қилинишича, жами 80 дона қутида 1280 та “Даклатасвир-60 мг” дори воситалари Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморларга тақсимланади.

Қайд этилишича, Миср гепатитнинг B ва C тури вирусларига қарши курашда дунё миқиёсида сезиларли муваффақиятларга эришган. Миср соғлиқни сақлаш вазирлиги маълумотларига кўра, мамлакат аҳолиси ушбу касалликдан бутунлай фориғ этилган бўлиб, Миср олимлари томонидан яратилган махсус диагностика аппаратлари ва уларнинг тажрибасини ҳам ўзбек мутахассислари билан ўртоқлашишга тайёр.

Ўзбекистон дипломатия ваколатхонаси хабарига кўра, Миср Соғлиқни сақлаш вазирлиги 5—8 сентябрь кунлари Қоҳирада ўтказиладиган “Аҳоли, саломатлик ва ривожланиш бўйича глобал конгрес” ишида Ўзбекистон соғлиқни сақлаш вазири Амрилло Иноятов иштирок этишини кутмоқда. Ушбу ташриф доирасида беғараз ёрдамни кенгайтириш истиқболларини муҳокама қилиш ҳам  мўлжалланмоқда.

Ушбу дори воситаларини етказиб бериш 29 апрель куни бошланганди. 5 август куни дориларнинг 12-партияси етказиб берилди.