Тожикистон расмий делегацияси Россиядаги меҳнат муҳожирларининг яшаш шароитларини ўрганиш учун Москва, Санкт-Петербург, Екатеринбург, Новосибирск ва Уфага жўнатилди. Бу ҳақда Тожикистон Меҳнат, миграция ва аҳоли бандлиги вазирлиги хабар берди.
“Тожикистон ҳукумати номидан Россиядаги меҳнат муҳожирларининг яшаш шароитлари билан танишиш ва улар ўртасида тушунтириш ишларини олиб бориш учун ишчи гуруҳлар тузилди. Бешта гуруҳ ташкил этилди, улар Москва, Санкт-Петербург, Екатеринбург, Уфа ва Новосибирскка жўнатилди”, — дейилади Тожикистон Меҳнат вазирлигининг Facebook’даги хабарида.
Россия Ички ишлар вазирлиги маълумотларига кўра, 2022 йилда Россия паспортини олган Тожикистон фуқаролари сони 60 фоизга ошган. Федерал хавфсизлик хизмати статистик маълумотларида айтилишича, 2023 йилнинг биринчи чорагида Тожикистондан 516 минг, иккинчи чорагида эса 548 минг фуқаро Россияга кирган.
Июнь бошида Санкт-Петербург шаҳридаги “Лахта-Центр” қурилиш майдонида тожикистонлик ва қирғизистонлик мигрантлар оммавий муштлашгани хабар қилинганди. Қайд этилишича, ишчилар бепул озиқ-овқат талашиб, можаро чиқарган.
Изоҳ (0)