Зимбабве президенти Эммерсон Мнангагва сайловчиларга унинг партиясига овоз беришса, жаннатга тушишларини ваъда қилди. Бу ҳақда Associated Press хабар берди.
Мнангагва митинг ўтказиб, тарафдорлари билан сайлов кампаниясининг қандай кечиши ҳақида гаплашди. У ўз нутқи давомида фуқаролар ҳукмрон партияга овоз бермаса, унга хиёнат қилган бўлишини таъкидлади.
“Қўлга киритилган мустақиллигимизни мустаҳкамлаш учун бизга ёрқин ғалаба керак”, — деди президент.
Мнангагва жаннатга бориш ваъдаларидан ташқари, тарафдорларига сурати туширилган нонлар тарқатди.
Зимбабведа президентлик сайловлари 2023 йилнинг 23 августида бўлиб ўтади. Президентдан ташқари парламент ва маҳаллий ўзини ўзи бошқариш органлари ҳам сайланади.
Аввалроқ Туркия президенти Ражаб Тоййиб Эрдўғон сайлов участкасида овоз беришдан олдин болаларга пул тарқатганди.
Зимбабведа ҳукуматни танқид қилиш тақиқланган
Зимбабве етакчиси Эммерсон Мнангагва президентлик сайловлари олдидан фуқароларнинг ҳукуматни танқид қилишига чек қўювчи қонунни имзолаганди.
Қонун зимбабвеликлар ўртасида “ватанпарварлик туйғусини ривожлантиришга қаратилган” бўлиб, бунга қарши бўлганлар учун ўлим жазосигача бўлган ҳукм назарда тутилган.
Ҳукуматни танқид қилиш ва уни ағдаришга чақириш, шунингдек, ҳарбий аралашув, иқтисодий санкциялар ва савдо бойкотлари учун мамлакат ичида ва ташқарисида митинглар ўтказиш тақиқланади.
Бундай ҳаракатлар “мамлакат суверенитети ва миллий манфаатларига қасддан зарар етказиш” сифатида баҳоланади.
Ушбу жиноятларни содир этганлар фуқароликдан маҳрум этилиши, 20 йилгача қамоққа олиниши ёки ўлим жазосига ҳукм қилиниши мумкин, гарчи охирги жазо 20 йил давомида Зимбабведа қўлланмаган.
Ўз навбатида, Россия президенти Владимир Путин Зимбабве президентининг мазкур қарори фонида унга вертолёт совға қилган.
Изоҳ (0)