АҚШда 10 ёшли Эмма исмли қиз ўлимидан 12 кун олдин орзусини рўёбга чиқарди ва энг яқин дўсти Даниэлга “турмушга чиқди”. Бу ҳақда Пассион нашри хабар берди.
Хабарга кўра, болалар улғайгач оила қуришни хоҳлаган, аммо лейкемия ташхиси бунга қаршилик қилган. Қиз ва унинг ота-онаси узоқ вақт давомида хавфли касалликка қарши курашишга ҳаракат қилган, аммо бу натижа бермаган.
Кейинги текширувдан сўнг шифокорлар қизнинг умри оз қолганини айтган.
“Кўпчилик болалар Disneyлендга боришни хоҳлайди, Эмма эса турмушга чиқишни ва уч фарзанди бўлишини хоҳларди”, — деди Эмманинг онаси.
Тармоқ фойдаланувчилари воқеани фаол муҳокама қилган. Баъзилар Эмманинг ота-онасини мақтаса, бошқалари уларнинг қарорини тушунмаслигини билдирган.
Тўйга Эммани ногиронлар аравачасида олиб келишган.
“Байрам боланинг энг бахтли кунларидан бирига айланди, аммо ёш қиз тўйидан 12 кун ўтиб оламдан ўтди”, — дейилади хабарда.
Лейкемия — қон ва суяк илиги саратонининг турли шаклларининг умумий номи. Касаллик кўпинча 15 ёшгача бўлган болаларда кузатилади. Лейкемиянинг охири ўлимга олиб боради, лекин ўз вақтида даволаниш билан кўпинча соғайишга эришиш мумкин.
Изоҳ (0)