200 кишилик афғон делегацияси Остонада. Қозоғистон “Толибон” билан нималарни келишиб олди?

2 август куни Қозоғистонга Афғонистондан 200 кишилик делегация учиб келди. 3—5 август кунлари Остонадаги конгресс марказида биринчи қозоқ-афғон бизнес-форуми бўлиб ўтмоқда, деб хабар берди Tengrinews.

Форумнинг биринчи кунида Қозоғистон бош вазир ўринбосари – савдо ва интеграция вазири Серик Жумангарин “Толибон” ҳукуматининг савдо-саноат вазири Алҳаж Нуриддин Азизий билан учрашувда маълум қилишича, Остона Афғонистон билан савдо айланмасини 3 миллиард долларга етказишни режалаштирмоқда.

Серик Жумангарин апрель ойида Кобулга ташрифи чоғида томонлар ўз олдига мамлакатлар ўртасидаги товар айирбошлаш ҳажмини 1 миллард доллардан 3 миллиард долларгача ошириш вазифасини қўйганини эслатди.

“Қозоғистон компанияларининг Кобулга сўнгги ташрифи якунларига кўра, бизнинг энергетик ичимликлар, ун маҳсулотлари, минерал ўғитлар (Афғонистонга) етказиб берилди, кунгабоқар ёғига қизиқиш бор. Афғонистондан импортда қишлоқ хўжалиги маҳсулотлари қаторига тўқимачилик маҳсулотлари ҳам қўшилди. Олдимизда фаол иш олиб бориш керак бўлган вазифалар бор”, — деди Серик Жумангарин.

Ҳамкорликни фаоллаштириш учун “Толибон” расмийларига Ҳиротдаги Қозоғистон Савдо уйи салоҳиятидан кенг фойдаланиш ва Қозоғистонда ўз савдо ваколатхонасини очиш таклиф этилди.

Учрашув иштирокчилари мавжуд савдо йўлларини ривожлантириш ва Афғонистон орқали товарларни етказиб беришнинг муқобил йўналишларини яратиш имкониятларини ҳам муҳокама қилди.

Қайд этилишича, Қозоғистон маҳаллий компанияларнинг Афғонистонда амалга оширилаётган бошқа иқтисодий лойиҳаларда, хусусан, транспорт, тоғ-кон саноати, телекоммуникация ва қишлоқ хўжалиги соҳаларида иштирок этиш имкониятини кўриб чиқмоқда.

Ўз навбатида, форумдан кейин “Толибон” савдо-саноат вазири Азизий Қозоғистон билан хусусий секторлар ўртасида қиймати 100 миллион доллардан ортиқ бўлган бир қанча шартномалар имзоланганини маълум қилди.

Қозоғистон ва Афғонистон таълим соҳасида ҳам ҳамкорлик қилмоқда. Бугунги кунда Ал-Фаробий номидаги Қозоғистон миллий университетида Афғонистондан 130 нафар талаба таҳсил олмоқда.

Серик Жумангарин агар зарур бўлса, Қозоғистонда таҳсил олаётган афғонистонлик талабалар сонини кўпайтиришни таклиф қилди.