Альп тоғларида бундан 37 йил олдин бедарак йўқолган альпинистнинг қолдиқлари топилди

Альп тоғларида 1986 йилда бедарак йўқолган германиялик альпинистнинг қолдиқлари топилди, деб хабар бермоқда “Zakon.kz”.

Исми келтирилмаган немис альпинистини полиция у 1986 йилги саёҳатдан қайтмаганидан кейин қидира бошлаган. Ўшанда альпинист 38 ёшда эди, бироқ қидирувлар муваффақиятсиз тугади ва ўнлаб йиллар давомида унинг қаердалиги сирлигича қолди.

2023 йил, 12 июль куни Швейцариянинг Маттерҳорн тоғларида юрган альпинистлар одам қолдиқлари ва бир нечта жиҳозларга дуч келди.

Полициянинг маълум қилишича, қолдиқлар музликдан топилган ва суд-тиббий экспертизаси учун Вале касалхонасига олиб кетилган. ДНК таҳлили 1986 йилдан бери бедарак йўқолган деб топилган альпинистнинг шахсини тасдиқлаган.

Полиция тоғдаги қордан чиқиб турган бир пой қизил боғичли этик суратини эълон қилди. Расмда бедарак йўқолган шахсга тегишли лагер жиҳозлари ҳам кўринади.

Сайёҳнинг ўлим ҳолатлари ҳақида қўшимча маълумот берилмаган.

Музликларнинг чекиниши бир неча ўн йиллар олдин бедарак йўқолган альпинистларни топишга тобора кўпроқ имкон бермоқда. Бундай қолдиқлар турли тоғларда, жумладан, Италиянинг Бландасида топилган.