Россия Хавфсизлик Кенгаши раиси ўринбосари, собиқ президент Дмитрий Медведев томонидан тинчликка бўлаётган доимий ядровий таҳдидлар – бемулоҳаза ва масъулиятсиз риторикадир. Бу ҳақда Оқ уй Миллий хавфсизлик кенгаши спикери маълум қилди, деб ёзмоқда CNN.
“Украинада ёки бошқа жойда ядро қуролидан фойдаланиш бутун дунё учун ҳалокатли бўлади ва Россия учун ҳам жиддий оқибатларга олиб келади”, — деди спикер.
Шу билан бирга, унинг қайд этишича, Қўшма Штатлар ҳануз Россиянинг ядро қуролидан фойдаланишга тайёрланаётганидан далолат берувчи белгиларни кўрмаяпти.
“Биз бўлаётган ҳодисаларни диққат билан кузатишда давом этамиз, бироқ ҳозирча ўз ядровий ҳолатимизни ўзгартириш учун ҳеч қандай сабаб ҳам, Россия ядро қуролидан фойдаланишга тайёрланаётгани белгиларини ҳам кўрмаяпмиз”, — дея қўшимча қилди у.
Июль бошида Дмитрий Медведев “Россия AЭСга ракета ҳужуми” уюштирилган тақдирда, Украинанинг учта атом электр станцияси ва Шарқий Европадаги атом объектини портлатиш билан таҳдид қилган эди.
Шу билан бирга, АҚШ президенти Жо Байден Россия ядро қуролидан фойдаланишига ишонмаслигини айтган.
Изоҳ (0)