АҚШ президенти Жо Байден тарихда илк бор АҚШ Ҳарбий-денгиз кучлари штаб бошлиғи лавозимига адмирал Лиза Франкетти исмли аёл кишининг номзодини илгари сурди. Оқ уй тегишли пресс-релизни 21 июль, жума куни эълон қилди. Франкеттининг номзоди ҳали АҚШ Сенати томонидан тасдиқланиши керак.
Франкетти ҳозир АҚШ ҳарбий-денгиз кучлари бошлиғининг операциялар бўйича ўринбосари. Илгари у Ўрта Ер денгизидаги АҚШнинг 6-флотига ва Кореядаги иккита авиаташувчи ҳужум гуруҳига қўмондонлик қилган ҳамда Қўшма Штатлар армияси штаб бошлиқлари бирлашган қўмитасининг стратегия, режалар ва сиёсат бўйича директори лавозимида ишлаган.
Франкетти номзодини эълон қилар экан, Байден унинг армиядаги 38 йиллик тажрибасини эътироф этди.
АҚШ президенти, шунингдек, вице-адмирал Жеймс Килбини денгиз операциялари бошлиғи ўринбосари лавозимига, адмирал Самюэль Папарони эса Ҳинд-Тинч океани қўмондонлиги раҳбари лавозимига таклиф қилди. Папаро илгари АҚШ Ҳарбий-денгиз кучлари штаб бошлиғи лавозимига энг асосий номзод ҳисобланган. АҚШ Ҳарбий-денгиз кучларининг амалдаги қўмондони адмирал Майк Гилдай иш стажига биноан истеъфога чиқади.
Аввалроқ Туркия тарихида илк бор Марказий банк раислигига аёл киши тайинлангани ҳақида хабар берилганди. Туркия президенти Ражаб Тоййиб Эрдўғон Ҳафиза Гае Эрканни Марказий банк раҳбари лавозимига тайинлаган.
Изоҳ (0)