Тошкент кўчаларидаги тунги чироқларга чекловлар ўрнатилди

Тошкент кўчаларидаги тунги чироқларга 20 июлдан бошлаб чекловлар ўрнатилмоқда. Бу ҳақда “Тошшаҳарнур” ДУК ахборот хизмати маълум қилди.

Унга кўра, Ўзбекистон ҳудудида ҳаво ҳарорати кескин кўтарилиши сабабли 2023 йил 20 июль кунидан бошлаб Тошкент шаҳрининг айрим марказий кўчалари тунги кўча ёритиш тизимида чеклов жорий қилинмоқда. Шунингек, келтирилган ноқулайликлар учун олдиндан узр сўралган.

“Ўзгидромет” маълумотларига кўра, 20 июль куни Тошкент шаҳрида ҳаво бир оз булутли бўлади, ёғингарчилик кутилмайди. Шамол ғарбдан 3-8 метр/секунд тезликда эсади, баъзи жойларда 10-12 метр/секундгача кучайиши, айрим жойларда чанг-тўзон билан кузатилиши мумкин. Ҳарорат кечаси 22-24 даража, кундузи 36-38 даража бўлади.

Ўзбекистон Соғлиқни сақлаш вазирлиги Жаҳон соғлиқни сақлаш ташкилотининг жазирамадан сақланиш бўйича тавсияларини эълон қилди.

Таҳлилларга кўра, 2022 йили кузатилган аномал иссиқ ҳарорат Европада 60 минг нафардан ортиқ одамнинг ҳаётига зомин бўлган. Бу — аввал прогноз қилинганидан уч баробар кўп кўрсаткич.

Хавотирли жиҳати, сайёрада глобал исиш жараёни давом этар экан, мазкур рақамлар йилдан йилга ортиши мумкин. Шу боис Жаҳон соғлиқни сақлаш ташкилотининг Европа минтақавий бюроси жазирамадан сақланиш бўйича қуйидаги тавсияларини эълон қилди:

• аномал ҳарорат кузатилаётган даврда иссиқ ўлкаларга саёҳат қилишдан аввал об-ҳаво прогнозидан хабардор бўлиб, эҳтиёт чораларини кўрган ҳолда йўлга чиқиш зарур;
• жазирамада доим салқин сув олиб юриш лозим. Зарурат бўлмаса, ҳарорат юқори соатларда кўчага чиқмаслик ва оғир жисмоний ишлар билан шуғулланмаслик керак;
• бундай вазиятда транспорт воситаларида болалар ва ҳайвонларни қолдириш тўғри эмас. Иложи бўлса, кундузи камида икки-уч соат давомида салқин жойда вақт ўтказган маъқул;
• тунда хона деразаларини очиш, кундузи офтоб нурини қайтариш учун хоналарга пардалар тутиш ва жазирама кунларда имкон қадар ўзидан иссиқ чиқарувчи электр мосламаларидан камроқ фойдаланиш мақсадга мувофиқ;
• организмнинг сувсизланишига йўл қўймаслик учун кунига етарли миқдорда суюқлик истеъмол қилиш жуда муҳим.