Беларусь махсус кучлари Польша билан чегарадан унча узоқ бўлмаган “Бресцкий” полигонида Россиянинг “Вагнер” ёлланма аскарлари билан қўшма машғулотлар ўтказмоқда. Бу ҳақда 20 июль куни Беларусь Мудофаа вазирлиги хабар қилди.
“Беларусь Қуролли кучлари ‘Вагнер’ жангчилари билан қўшма машғулотларни давом эттирмоқда. Бир ҳафта давомида махсус операция кучлари бўлинмалари компания вакиллари билан биргаликда ‘Бресцкий’ полигонида жанговар тайёргарлик вазифаларини ишлаб чиқади”, — дейилади вазирлик матбуот хизмати хабарида.
Ушбу полигон Украина чегарасидан деярли 40 километр, Польша билан чегарадан эса тахминан 30 километр узоқликда жойлашган.
Беларусь бўлинмалари ва россиялик ёлланма аскарларнинг қўшма машғулотларидан олинган илк кадрлар эълон қилинди.
23—24 июндаги “Вагнер” қўзғолонидан сўнг компания асосчиси Евгений Пригожиннинг Беларусга кетиши ҳақида эълон қилинди. “Вагнерчи”ларга эса уйга қайтиш, Россия Мудофаа вазирлиги билан шартнома имзолаш ёки Пригожинга эргашиб, Беларусга кетиш таклиф қилинди.
14 июль куни Беларусь Мудофаа вазирлиги “Вагнер” ёлланма аскарлари мамлакатга келганини хабар қилди. Унга кўра, Могилев вилоятида, Осиповичи шаҳри яқинида мамлакат ҳудудий мудофаасига ҳарбий хизматга чақирилганлар учун “ўқув майдонлари” яратилган, у ерда “Вагнер” ёлланма аскарлари инструктор сифатида ишламоқда.
“Беларуски Гаюн” мониторинг гуруҳи маълумотларига кўра, 19 июль куни кечқурун “Вагнер”нинг тўққизта колоннаси Беларусга етиб келган, мамлакатда аллақачон компаниянинг 2000-2500 ёлланма аскарлари мавжуд. Қайд этилишича, Беларусга жами 10 000 га яқин ёлланма аскар келиши режалаштирилган.
Изоҳ (0)