2023 йилнинг ўтган олти ойи давомида Самарқанд вилоятининг 7 та туманида қотиллик, бир шаҳар ва 4 та туманида эса номусга тегиш жинояти содир этилмагани маълум қилинди. Бу ҳақда вилоят ИИБда Ички ишлар вазири ўринбосари Нажмиддин Тўрахўжаев ҳамда вилоят ИИБ бошлиғи Раҳмат Маматовлар иштирокидаги йиғилишда маълум қилинган.
Таъкидланишича, масъуллар иштирокидаги йиғилишда 2023 йилнинг олти ойи давомида вилоят ҳудудида жиноят ва ҳуқуқбузарликларнинг барвақт олдини олиш, жамоат тартибини сақлаш ва йўл ҳаракати хавфсизлигини таъминлаш борасида амалга оширилган ишлар ҳамда йўл қўйилган камчиликлар, шахсий таркиб томонидан хизмат интизоми, қонунчиликка риоя этилишининг аҳволи ҳамда бу борада йўл қўйилаётган камчиликлар муҳокама қилинган.
Айтилишича, Самарқандда 2023 йилнинг ўтган олти ойи мобайнида 3926 та жиноят содир этилган бўлиб, шундан 91,9 фоизи, яъни 3607 таси фош этилган.
Йиғилишда, шунингдек, ўтган фурсат давомида вилоятнинг Булунғур, Жомбой, Нарпай, Нуробод, Паяриқ, Пахтачи ва Қўшработ туманларида бирорта ҳам қотиллик жинояти содир этилмагани, Каттақўрғон шаҳри, Нарпай, Паяриқ, Самарқанд ва Қўшработ туманларида эса номусга тегиш жиноятига қўл урилмагани маълум қилинган.
Пахтачи, Тойлоқ, Қўшработ туманларида оғир тан жароҳати етказиш, Каттақўрғон шаҳри, Булунғур, Жомбой, Иштихон, Каттақўрғон, Нарпай, Нуробод, Оқдарё, Паяриқ, Паст Дарғом ва Қўшработ туманларида эса талончилик, Нуробод ҳамда Тойлоқ туманларида безорилик жинояти содир этилишига йўл қўйилмаган. Тезкор-қидирув тадбирлари натижасида умумий жиноятларнинг 91,9 фоизи фош этилиб, 231 нафар қидирувдаги шахслар ушланган, — дейди йиғилишда қатнашган вилоят ИИБ ахборот хизмати раҳбари Жаҳонгир Сагдуллаев.
Изоҳ (0)