Саудия Арабистони ва Туркия воситачи сифатида Россияга депортация қилинган украиналик болаларни қайтариш бўйича яширин музокаралар олиб бормоқда. Бу ҳақда музокаралардан хабардор тўртта манбага таяниб, Financial Times хабар берди.
Нашрнинг ёзишича, музокаралар бир неча ойдан бери давом этмоқда. Учрашувда уруш бошида Россия-Украина тинчлик музокараларида, маҳбуслар алмашинуви ва дон битимини муҳокама қилишда воситачи бўлган тадбиркор Роман Абрамович ҳам иштирок этмоқда.
“Конфликтнинг ҳар икки томони учун болаларни депортация қилиш муаммоси шунчалик жиддийки, маҳбусларни алмашиш бўйича музокаралардан фарқли ўлароқ улар буни бир-бирлари билан тўғридан тўғри гаплашишдан бош тортади”, — дейилади хабарда.
Саудия Арабистони Копенгагенда бўлиб ўтган G20 аъзоларининг йиғилишида украиналик болаларни қайтариш бўйича музокаралар ўтказиш зарурлиги масаласини кўтарган. Шу билан бирга, Ғарб давлатлари Саудия Арабистонининг воситачилардан бири сифатидаги ролини маъқуллаган.
Россия Украинадан қанча болани депортация қилган?
- Украина маълумотларига кўра, уруш пайтида 20 минг бола босиб олинган ҳудудлардан ноқонуний равишда депортация қилинган.
- 2023 йил март ойида Гаагадаги Халқаро жиноий суди Россия президенти Владимир Путин ва Россия болалар омбудсмани Мария Лвова-Беловани болаларни Украинадан мажбуран олиб чиқишда айблаб, ҳибсга олишга ордер берганди.
- Россия ҳукумати болаларни Украина ҳудудидан олиб чиқишни инкор этмайди.
- Айни пайтда расмий Москва бу уларнинг хавфсизлиги учун қилинганини даъво қилмоқда.
Изоҳ (0)