Россия қирувчи самолётининг учувчиси Сурия осмонида ўз ҳаракатлари билан АҚШ разведкачи самолётининг тўрт нафар экипажи ҳаётини хавф остига қўйди, деб хабар бермоқда Associated Press америкалик расмийларга таяниб.
Нашр суҳбатдошларининг сўзларига кўра, 16 июль куни Россиянинг Су-35 қирувчи самолёти Американинг МS-12 разведкачи самолётига “жуда яқин учган” ва уни гирдобсимон йўналишда учишга мажбур қилган. Россия қирувчиси қанчалик яқин учганига расмийлар аниқлик киритмади.
Ўша куни Суриядаги томонларни яраштириш бўйича Россия маркази раҳбари ўринбосари Олег Гуринов АҚШ бошчилигидаги коалиция самолётлари, жумладан, МS-12W уч марта Сурия ҳаво ҳудудини бузганини маълум қилганди.
AP манбаларининг айтишича, россиялик учувчининг сиқиб қўйиши Америка экипажининг самолётда хавфли учишига сабаб бўлган. Улар ҳодисани “хавфли хатти-ҳаракатларнинг янги даражаси” деб атади ва “бу бахтсиз ҳодиса ёки одамларнинг ҳалок бўлишига олиб келиши мумкин эди” дея қўшимча қилди.
Associated Press агентлигининг таъкидлашича, Россия қирувчи самолётлари АҚШнинг МQ-9 Reapers дронларини бир неча марта таъқиб қилган бўлса-да, сўнгги воқеа америкаликларнинг ҳаётини хавф остига қўйгани учун хавотир уйғотди.
Пентагоннинг юқори мартабали мулозими нашрга айтишича, Сурия осмонида Россия фаоллигининг кучайишига қарши туришнинг бир қанча вариантларини кўриб чиқмоқда. Қайд этилишича, россиялик учувчиларнинг ҳаракатлари июль ойи бошида Америка ҳарбийларининг ИШИД етакчисига зарба беришга уринишларини мураккаблаштирган.
Associated Press манбаси бу сценарийлар ҳақида батафсил маълумот беришдан бош тортди, у фақатгина АҚШ ИШИДга қарши кураш миссияларини бажариш учун Сурия ғарбига учишда давом этишини айтди.
AP Россия ҳарбий фаоллигининг ошишини Москва, Теҳрон ва Сурия ҳукумати ўртасида АҚШни Суриядан чиқиб кетишга мажбурлаш мақсадида ҳамкорлик кучайгани билан изоҳлади.
Эслатиб ўтамиз, 5 июль куни Россиянинг учта қирувчи самолёти Сурия осмонида Америка дронларига хавфли даражада яқин учиб, уларнинг йўналишдан оғишига сабаб бўлганди.
Изоҳ (0)