Жанубий Кореяда кучли ёмғир туфайли юзага келган сув тошқинлари ва кўчкилар қурбонлари сони 32 кишига етди, яна 10 киши бедарак йўқолган, деб хабар берди Yonhap агентлиги.
Аввалроқ 21 киши ҳалок бўлгани ва 10 киши бедарак йўқолганлиги ҳақида хабар берилган эди.
Жанубий Кореяда ўтган ҳафтадан бери кучли ёмғирлар давом этмоқда. Корея метеорология бошқармаси маълумотларига кўра, сешанба кунидан ҳозирги кунга қадар бир қанча ҳудудларда 470 миллиметрдан ортиқ ёмғир ёғган.
Сув тошқинлари туфайли 211 та йўл, жумладан, миллий автомагистраллар, шунингдек, 20 та миллий боғдаги пиёдалар йўлаклари ёпилган. Мамлакатнинг марказий ҳудудларини бошқа ҳудудлар билан боғловчи тезюрар поездлар ва мунтазам поездлар ҳаракати тўхтатилди.
Деярли 6000 киши ҳали ҳам эвакуация марказларида қолмоқда, улар ҳали уйларига қайта олишмайди.
Метеорологларнинг прогнозларига кўра, бир қатор марказий ва жанубий вилоятларда ёмғир сешанба кунига қадар давом этади. Мутахассисларнинг огоҳлантиришича, бу ҳудудларда 300 миллиметргача қўшимча ёғингарчилик ёғиши мумкин.
Изоҳ (0)